الهيـــــــــــــلا *** منتدى قبيلة عتيبة - ابوي عساه للجنه سلام بسلام

["]
ابوي عساه للجنه سلام بسلام=له سيرةٍ غير ومنزاله سوات الجدي
ماهوب نقال للنمه وزيف الكلام=ولاهو على غرة الغافل يجيك يعدي
عن فرض ربه ما كبر للوساده ينام=يوم اكثر الناس في هذي نصيبه ردي
ولايتبع الشك ولايمشي دروب الحرام=كريم طبعه وكفه بالمكارم ندي
عن واجبه ما توانا بالمجي والمقام=يوم العذر للمهين اللي يبا المرقدي
وعلمني اشوم عن درب الردي والخمام=واخذت منه الوصاه اللي وراها سعدي
والصد عن كلمةٍ تجلب علي الملام=وعن ضول بعض المجالس لو جلست وحدي
وانا وريثه على هذي واشد الحزام=واوصي عليها واحرص من يكون بعدي
ما انساني الوقت قوله وانحنيت إحترام=يوم اتذكر كلامه يوم قال ولدي
اسمع كلامي وحاول تحفظه بالتمام=لو يحتدي الوقت حذرا لاتجي محتدي
لو اكثر الناس طارو في عجاج العسام=من طار في عجها لابد يوم يغدي
ولاتتبع البارق المقفي وسود الغمام=ولاترتجي برقها لو ليلها سرمدي
وقدام لا اختم كلامي وانتهي للختام=في خاطري كلمةٍ قدام انا لاابتدي
ياللي تحاول تفرق في خطوط النظام=تراي انا منك من مبطي مغسل يدي

حمد المغيري