مشكور يا قرمن له المجد عنوان=اعداد ما ذعذع نسيم البرادي
واعداد ماناحت على خضر الاغصان=ورق الحمام وما استباح الفوادي
فيها القرايح نظم لولو ومرجان=فرايدن له وجّهن باعتمادي
اللي فزع لي فزعتن شانها شان=تنشر له البيضاء بروس المبادي
ياطيب الفزعات ياذرب الايمان=عسى سنينك يابو مشعل عيادي
ياعزوة اللي من غثى الوقت بلشان=ياللي على بذل الجمايل تنادي
يفداك من يبغى الجميله وبحلان=خطوى البخيل اللي فعوله دوادي
اللاش يبغى المال للعمر رفوان=مايدري انه موعدن بالحصادي
شتان يا أفعال المخاليق شتان=أحدن نهج بالطيب و أحد متحادي
الطيب لولا الطيب غالن بالأثمان=ماكان راع الطيب ذكره يشادي
يابن دغيثر ياسلايل كحيلان=زبن الرفيق ليا حدنه حوادي
لولا كذا ما حط للمجد ديوان=و لا خلد التاريخ راع الشدادي
انتم هل الأمجاد من ماض الأزمان=ياعيال منهو للمهمه سنادي
عايض بنى في ذروة المجد صيوان=وخلد له التاريخ فعلن وكادي
من نبع جوده يبتهج كل عطشان =بحاله وماله لا نخيته يفادي
يعطي الجزايل مايحسّب للأثمان=تغن العواني مدّته بالأيادي
ونجمن على شوكة خصيمه ليا بان=لا زل عن درب الهدى والرشادي
عز الخوي لو هو من القوم ومدان=لا قيل تكفى بالركن يالصمادي
وخلّف شبولن بين قومن وصدقان =تنومس اللابه نهار العنادي
اليا وقف ديّان في وجه ديّان=تشفيك لو ان الخصيم متمادي
وان جيتهم عاني من الحمل زملان=غديت فـ أوسع من فياح الريادي