صاحبي حط فيني مثل مقلـع طميّـــــه = يوم شدَّت تبي القطـن وقفَّت وراهــــا
انحفـر قـاع قلبي ما بقالـه بقيـّـــــــــه = حين قفَّت عنود الصيد تتبع وراهــــا
عزّتـي للّـذي مالـه بها مقدريّــــــــــه = لااقبل الليل عيني صار جاها بلاهــا
واعذاب المعنّى حين يطـري عليّـــــه = ريم وادي حنيفـه دمعتي هل ماهــــا
ياهل الشعـر ردُّّوا جاوبونـي بنيّــــــه = واحْذروا من ملالي لاتزيدوا عناهــــا
هو متى اللّي تريد العزفي كل هيـّــه = والبلا وَقْْْْْْف حظّي قصَّرت به اخطاها
يا شيـوخ الجزيره يا رجال الحميـّــه = من تضَيْم لديكـم افزعوا له بجاهــــــا
وين شيـخٍ يطالع في ملفّ القضيّـــــه = ابْتغانـم حياتي قبـل يدنـي وفاهــــــــا
ان توجّه لي اكبار الشيـوخ الوفيّـــــه = فاعتبرنـي بعيطـا ماحدٍ قط جاهــــــا
حالفٍ من تسبّب لا اشترى له ضْحيّه = كل عـامٍ على دَيْنٍ نسـدد وفاهــــــــا
انْ حصل لي وليفي اشهد انْ ما عليّه = طاب كيفي ويا محلا حياتي معاهـــا
ونْ تردّى نصيبي فاكتبوا لي وصيّه = سامحٍ من حياتي مع مشاكل غثاهـــا