بوستك تكفي عن عظيم التباشير=وانسى خطاك .. ولا حصل منك زله
انا فدى رجولك على الشر والخير=وإلعن ثوى قلبي .. وروّح وخله
ما عاش من يردعك يا حادي الطير=يا قمة ٍ فوق القمم مستقلة
هويت لعبك مثل ( سقاي ) للبير=ما عاف ثوبه يوم طشه وبله
اسهر على حبّك بـ ( زين التفاكير )=واقهر خليل ٍ ضاق من جور خله
حبّك ممركزني على قمة النير=المركز الاول . . . ولقمة مجله
خذيت شهره ما خذوها الاساطير=لوّي ( امد اليد ) عاينت دله !
مجنون ليلى عرّفته الدساتير=وانا اعرفوني من حبيبي وظله
حبّك منام ٍ ما لقى له تفاسير=يا كود ( قلبي ) فاهم اللي يشله
يا ريّس العشاق .. يا مغربل الغير=خطيت شعري فيك .. دقه وجله
كلام ٍ مزخرف .. واكرره تكرير !=قلبي يحب الشعر .. والشعر ملّه
ماني بداري كيف ؟ ولا فيه تبرير=الوقت يمشي وانت جعلك فدى ٍ له
يا عشقي الاول جميع التقارير=تثبت لك ان القلب غرقان كله
انته ملاك ٍ صفّت إله الطوابير=ما فيه عيب ولا حصل فيه عله
جعلك ذخر .. فالوقت الاول والاخير=يا طلة الفردوس .. يا حيّ طله
بوستك .. تكفي عن جميع التباشير=تبا الصراحه ؟؟ ما حصل منك زله