يا فلاح الهم خيّم فوق قلبـي يـا فـلاح=كيف تبغاني اسولف وانت خابرني عليـل
ويش قولك في عليل ٍ في حياته ما استراح=تنتثر دمعة عيونه لا ظلم الليـل الطويـل
حالته لا ما تباعد حال سلطـان الربـاح=بالخطأ راحت حياته والخطأ مالـه مثيـل
كان ويّا صاحبه اثنين فـي أرض ٍ بـراح=يطردون الصيد دايم من صبح لين المقيـل
اجمعتهم صحبة الدنيا على جـد ومـزاح=ما يهابون الليالي والحمول اللـي تميـل
ما قتل عامد ولكن ثوّر ابليـس السـلاح=بالخطأ ثار السلاح وين يلقـى لـه دليـل
انعقد سجنه وربعه تنتظـر فـك السـراح=والأكيد انه سجين وما رضوا ربع القتيـل
هل دمعه يوم صلـى ركعتيـن فالصبـاح=في نهار الجمعة اللي من ثقيل ٍ في ثقيـل
هلّل وكبّر ونفسـه تذكـر اللـي راح راح=كان في ربعه عزيز وذلّه الوقـت الذليـل
لا محمد لا تهاني لا سعـود ولا صـلاح=كلهم كانوا على باله وهمّـه فـي هديـل
طفلة ٍ ما كمّلت عامين صايبهـا كسـاح=وانتثر دمعه وحاله مـن سبايبهـا نحيـل
حان تنفيذ القصاص وغطوا الراس بوشاح=وجاك سيّافه يشيل السيف ابو حد ٍ صقيـل
ارتخى راسه وزاد الموقف الحامي صياح=بين نوح وبين دمع وبين صيحات وعويل
وارتفع صوت الحشود وزاده محمد وصاح=يا يبه تكفى دخيلك تستمع قـول الدخيـل
يا يبه وشلون نصبر كيف نهجع بارتيـاح=وانت من دنيا عيالك ماخذك مر الرحيـل
يا محمد هاك علمي واحفظه قبل المـراح=انتبه لاخوانـك وبالـك عليهـم لا تعيـل
والله الله فالصلاة وفالصيـام وفالصـلاح=والله الله فأمكم والله لكـم بعـدي كفيـل
غمّض عيونه ونفسه تطلب الله السمـاح=رافـع ٍ سبابتـه مظلـوم والله الوكـيـل
سل سيّاف الصفا سيفه ودقـه ثـم طـاح=رأس سلطان المراجل وانتثر دمـه يسيـل
غسلوه وكفنوه وفاح طيب السـدر فـاح=وبالمصادف صار قبره جنب قبر ابن العقيل
يا فلاح الكارثه ما هي سوالف يـا فـلاح=خلني ساكت ودوّر غيـر هالقصـه بديـل