أهل الهيلا وزوارها الكرام

السلام عليكم

اعتذرعن الغياب
واسمحوا لي بهذه القصيده

قفل حساب المحفظه بعد صفيت=معاد لي في سوق الأسهم تجاره
ياليتني في سوقها ماتعنيت=ماأخذت منها إلا الفلس والخساره
أمسيت فيها مغتني ليلة أمسيت=واصبحت ضيف الفقر نازل بداره
وش عاد ياسوق الهواميرخليت=من لؤلؤ البحار ولا محاره
كنت اتحلم اغتني وابتني بيت=والجيب ياقف في كراج العماره
واسلف المحتاج حسب الثوابيت=وافزع لابن عمي وضيفه وجاره
وفجأه على الواقع من الحلم فزيت=الله ولا حلمٍٍ كواني بناره
(من كثر مامن بعض الأحلام عانيت=حتى اتصال الهاتف بلا حراره)!!
بالله عليكم ياهل الجاه والصيت=أحدٍ تجرع مثل هذا المراره
مرة سنه ما في الليالي تهنيت=مره يمين الدرب ومره يساره
في الليل اسامر منتديات وصيت=والسوق من بدري اتحرى اخباره
أقرا البلونجر كل ما اصبحت وأمسيت=واتبع الشارات شاره بشاره
مافيه عصر مع الجماعه تقهويت= ولافيه يومٍ نمت بأول نهاره
(ولا عاد عندي للمواعيد توقيت= إلا صلاة الفرض والإستخاره)
وعلى اجتهادي وكثر ما اقبلت واقفيت= عيت تفيد المعرفه والشطاره
((واصبحت من كثر الضغوطات كبريت= من يوم تشخطبه يولع شراره))
احيان يضرب ها المؤشر دناميت=ويصفق بالأحمر ويتبدل مساره
ولاعادتسمع غير وش بعت وابقيت= والناس واجد يقطعون الإشاره
ياطول ساعات الحزن والتناهيت= وياقصر ساعات الفرح والبشاره
رحنا ضحايا الحرب بين الطواغيت=كلٍ على الثاني يسند بغاره!!
والسوق كله اصبح بكف عفريت=الله يدمر من سعى في دماره