لاتتصل ماعاد لي فالهوى ذوق=اعطيك جوالي هديه وفارق
بعض المحبه مالنا وسطها سوق=وحب على غير الشرف به فوارق
خلاص مالي شوق يامرتع الشوق=دور وتلقى شخص مارد ومارق
انا بدوي(ن) شوقه الروض والنوق=والخايع اللي من زبا السيل غارق
في حاجره تنبت خزامى ورقروق=ويعلها نوّ لها نوض بارق
لاخيّلت هجماتها رعود وبروق=واليا امطرت نزواتها غيث فارق
فوحة نداها ينعش القلب ويتوق=تسرق هموم القلب تقول سارق
كن الوطا يجمع لي العشب برفوق=ويمدها حزمة ورود وزبارق
ماكنّي الا قبل ساعات مخلوق=صحوة عمر لو رمح الاقدار زارق
ماشلت في قلبي من الهم معلوق=يوم ان هم القلب للقلب حارق
مبعد عن اهل الحسد والحقد والعوق=ماحاشني من قول الانذال طارق
اللي تحط الطاق بالطاق مطبوق=وتكسر على ركاب الهروج المطارق