مرحوم ياشيخ ٍ عزيز ٍ فقدناه = في ذمة اللي كلنا نلتجي له
الحكم لله والمقدر رضيناه = ولايملك المخلوق حيل ٍ وحيلة
عساه بالجنة مقره ومثواه = بين الغصون اليانعة والظليلة
والله يغفر زلته مع خطاياه = ويجبر عزاء نفس ٍ تعزت عليلة
شيخ ٍ طروقه بالمراجل مخلاة = حمله على حمل الجماعة يشيله
ياطيب راسه بالرجاجيل طيباه = عزّام شيّال الحمول الثقيلة
زيزوم ربعه والدعاوي تنصّاه = لغابت القمراء وتاه الدليلة
كل الدعاوي حلها ماتعداه = لكبرت الدعوى وصارت طويلة
بالراي والحكمة وبالعقل والجاه = حلاّلها بين العميل وعميله
كل المراجل حاشها باوّل صباه = هدّاج تيماء نبذة ٍ من قليله
ماتجمعه يمناه تفنيه يمناه = في مجلس ٍ كل النشاماء تجي له
والمدح يزها الشيخ والشيخ يزهاه = رجل ٍ هواه المرجلة والفضيلة
وخلف سباع ٍ بالمواقف مضرّّاه = شجعان لمال الدهر ترتكي له
وعساء السحاب اللي سراء وانتثر ماه = يمطر على قبره نهاره وليله
وتنبت رياحينه وتنبت خزاماه = ويضفي على دار العزيزين سيله
قوم ٍ لهم في ذروة المجد مرقاة = اولاد ذائب متعبين الاصيلة
بيوتهم للضيف دائم مبناه = قبيلة ٍ تسلسلت من قبيلة
واخر كلامي ينتهي عند مبداه = مرحوم ياشيخ ٍ فجعنا رحيله