يافهد علّم حبيب والعصيمي والرياحي = والسناني علّمه والمورقي مرّه وقله
شايفاً لي فرخ داباً هقوتي ماهو بصاحي = ياكل الديبان لو نيبانها مثل الأخله

يافهد وصّل رسالة صاحبك قبل الصباحي = والنوايا صادقه واللي عقد حبلاً يحله
البحر موجه غمر جاله على كل النواحي = والطريق المعتدل مع دربكم حنا ندله

ماعلى دربك ياكود القوم والسم الذحاحي = من حسدهم مايبون أسمك يجيهم في المجله
مير سل السيف وسط المدن ولا في الضواحي = لين تصبح دولةً في الشرق حره مستقله

مستعيناً بالكريم وبالذخيره من سلاحي = والعلاج لياعطيته غصب يبري كل عله
عقب راس الرجم لو براق كل الناس لا حي = ماعليّ خلاف ياراع الوفا والسيف أسله

الجماعه كلهم عند المقابر بالمساحي = وأن ذبحت الوجه الأقشر جاك الأخر فازعلّه
والنصيحه لا تجيب الكسب من حيد المراحي = الرفيق أبعد عنه وأخذ حلال القوم كله

النصيحه من رفيقي كنها الجم القراحي = حالفاً الّه بالكلام الزين والله حالفاً الّه
كلمة الرجال يارجال زادت في أنشراحي = كل واحد منوته ياصل لميقافاً وصلّه

يوم أقوله عارفاً ماكل شياً لك مباحي = لاتطيع العالم اللي مالهم مذهب ومله
في حياتي ماجذبني لا سراب ولا ضحاحي = والبحر ماحيد من دونه وشوفي مايزله

أبشر إني مشاياً في درب ماجوب وصلاحي = والكلام اللي تقوله يارشيد مترجملّه
مايضيع العلم يارجال في قلوباً صحاحي = والقمر يثبت محله ماتغيّر عن محله