بديت بسم اللي للأسرارعلام = الواحد اللي ماسجدنا لغيره
رب الملا مجري الهبايب والأنسام = اللي بعث بين الخلايق نذيره
سلام ياسامي عدد خط الأقلام = ياعزوتي يوم الليالي خطيره
يامبعدن عنا ورا هاك الأروام = أمسيت في ديره وربعك بديره
أوصيك في بعض الوصايا والأعلام = يطري على بالي وصايا كثيره
على العلوم الطيبه حث الأقدام = واترك هزيلات العلوم الفقيره
اتعب لها فالغرب والشرق والشام = واحسب حساب الأوله والأخيره
لايخدعك زيف الليالي والأيام = ياعنك دنيانا رحن مستديره
لو ضحكت يومن لنا والبخت قام = لابد من يومن يبيح السريره
انصحك بالممشى على دين الإسلام = الوقت ما تعلم بشره وخيره
واحذر تخاوي كل واشي ونمام = أهل العلوم الطايلات القصيره
اليا بغيت تعيش في خير وأنعام = لا تصحب الرديان واعمى البصيره
خاو الرجال أللي عزيزين وحشام = أهل المدايح والوجيه السفيره
تلقى غلاهم زاد عامن بعد عام = وتلقى بهم نخوة حميه وجيره
والضيف لاجا حلتك يبن الأ كرام= أ كرم سباله لين حزت مسيره
وخوي جنبك كون له ستر وحزام = وعداك سللها السيوف الشطيره
وخصمك ليا جاء حجتن بين الأخصام = افلجله الحجه وخله بحيره
خلك صميدع فالمواقيف مقدام = واسبح بغبات البحور الغزيره
وان كان ودك يمشي العلم قدام = دور صليب الراي ثم استشيره
وان مال دولاب الدهر والزمن ضام = الرجل عزه باللتحام العشيره
ترى البحر مايسبحه كل عوام = والعظم مايجبر بدون الجبيره
للخيل ركابه وللنار شعام = وطيرن بلاجنحان يصعب مطيره
هذا وصلى الله على خير الآنام = محمد اللي سيرته خير سيره