بسم الله الرحمن رب العبادي=الواحد الفرد الصمد عالي الشان
علاًم خافي نيتي واعتقادي =واللي لوجهه تسجد الإنس والجان
ومن بعد ذكر اللي عليه اعتمادي=تهيض الخاطر وجريت الألحان
والشعر له وضع ونظام ومبادي=ينظم عليه الوزن معنى وقيفان
وان كان جينا للكلام الوكادي=لا خير في هرجٍ على غير برهان
وأنا شعوري للوطن غير عادي=اللي تعلى فوق عن كل الأوطان
دارٍ غلاها ساكن في فوادي=ويجري مجار الدم في كل شريان
للمجد يالله سارعي يابلادي=ومشي على الدستور سنة وقرآن
تنهضي واستبشري بالعيادي=في ظل حكامٍ لهم بالفخر شان
آل السعود منزحين الأعادي=أخوان نوره من قديمات الأزمان
أهل الوفاء وأهل التقى والرشادي=وأهل الفعول اللي يروعن الأذهان
اللي بحد المرهفات الهنادي=حموا جوانب نجد من عقب ماكان
مغازي مابين صبح وهجادي=وأنواع سوء الفعل وأنواع الأديان
وقت المجاعة والجهل والعنادي=مافيه لا رحمة ولا وازع إيمان
ومن عقب ماكلن للآخر يعادي=اليوم صاروا كلهم مثل الأخوان
الله يعز أهل الفخر والشدادي=والله يحفظ الدار في أمن وأمان
في ظل ابو متعب كريم الأيادي=ابن الملوك مطوعت كل فسقان
عبدالله الحر الشجاع العمادي=صقر العروبه من يعاديه خسران
غيثٍ ومن وبله جرى كل وادي=ليثٍ تباشر به قبايل وعربان
ياكثر حبه عند حضر وبوادي=من الساحل الغربي ليا ساحل عمان
ومن الحديداء كل مشملت زادي=حب وغلا واخلاص في كل وجدان
يملك صفاتٍ ما ملكها قيادي=وصايفٍ ماتجتمع داخل إنسان
مجتمعةٍ حكمة ورايٍ سدادي=ورحمة وحسن مقابل وجود وإحسان
وهيبة ونظراته لخصمه حدادي=وعطفٍ على رملاء وتقدير شيبان
وان جات في وقت القسى والنكادي=مواقفه تجلى عند الكبد الأحزان
لا جاء نهارٍ فيه قدح الزنادي =كلن يعود في ظلاله ليا بان
لجل العرب مايهتني بالرقادي=القدس غيره شايل هم لبنان
قايد مسيرتنا حسين المبادي=وولي عهده منبع الجود سلطان
حرٍ ليا منه كفخ للهدادي=عزالله أنه لانتهض طير حوران
تودع يمينه ماتشده نفادي=سلطان سلطان أبو خالد كحيلان
ملوكنا اللي بالشريعة تنادي=الله يعز أخوان نايف وسلمان
حنا بحكم اللي تضد المعادي=وشتان مابين الحكومات شتان
ومن صدعن طاعت ولي الأمر غادي=غلطان في فعله وستين غلطان
يتبع له أفكارٍ على غير قادي=تنفيذ متطرف وتخطيط عدوان
كبودهم منا ملاها السوادي=ومن حقدهم قاموا يغسلون الأذهان
قالوا ترى قتل المواطن جهادي=وتاهوا وباتوا في مذله وحقران
تفكيرهم كنه عيون الجرادي=لاشك حنا من ورى كل خوان
الظلم يردع والمطيه تقادي=وللجرح دكتوره وللسفن ربان
وللعين لاروغ نظرها رمادي=وللحمل شياله وللخيل فرسان
لجل الوطن ناقف ودونه نفادي=ونرخص له الأعمار ونشيل الأكفان
حنا سلايل مزحمين الطرادي=أبناء وآباء وعمومه وجدان
منا الولاء لأهل السيوف الحدادي=وأرواحنا من دونهم مالها أثمان
وأهل التلفزونات وأهل الروادي=كلابٍ تنابح والقوافل بالأرسان
مانستمع لمجمعين الدوادي=وصفوفنا ماهزها كاينٍ كان
دون الوطن ناطى على كل عادي=ليا انفتح بيبان وانصك بيبان
هذا وأنا أعبر بقدر اجتهادي=والكذب له ميزان والصدق ميزان
عطرت قيفاني بمسكٍ وكادي=فرايدٍ مني جزيلات وسمان
هذا وصلى الله على خير هادي=شفيعنا في ساعتٍ شانها شان
عداد ماذعذع نسيم البرادي=وماغنت الورقى على خضر الأغصان
وعداد صوتٍ فالمنابر ينادي=ومن طاف بالكعبه ومن زار الأركان