تعال ياشعر خل المحكمة تحكم = ما دام كلن عليك مشمر إذراعه
قضية الشعر ألا ياليتها تحسم = ويمنع عن الشعر من لا يعرف أسناعه
ياشعر تالي الليالي كأنك الأسهم = يومين فوق السماء ويومين في القاعه
بأسباب من هو بليا عرف ويتمتم = ومولع النار في نفسه بولاعه
وأنا أعرف أن العرب ياشعر ماترحم = لكن مازال لك ياشعر سماعه
كم واحدن مبتليك يقول أنا بنظم = أبنظم الشعر أجيد الشعر بأنواعه
وهو ليا طب بحرك صار متلعثم = معه السفينة لكنه فاقد أشراعه
واللي بلا موهبة في الشعر لا يحلم = الشعر سيل(ن) غزير صعب مقطاعه
وألا على الشاعر الموهوب كالبلسم = في كل شيءٍ يريده الشعر طاعه
وكم واحد ينقد الشعار مايفهم = ترى الذهب مايعرفه غير صناعه
ينقد وهو من وراء الأبواب متلثم = تلقاه طول الدهر ماينزع إقناعه
وأن شاف موهوب فوقه صار يتهجم = ويقول هذا علينا كيف مطلاعه
ونقده على الشعر لا وخر ولا قدم = لكن عينه تبا تدمع من إصباعه
الشعر ماينقده غير متعلم = في المعرفة والمعارف طايل(ن) باعه
والشعر عند العرب هو معجم المعجم = في الوزن والكيل دايم عالي صاعه
وكل القبايل بها شعّار ماتنذم = والشعر موجود حتى تطلع الساعة
والآن ياشعر ابى توقيعك وتبصم = لشاعر اللي على الجزلات منباعه
وياشعر أنا بخدمك مادام اللي تخدم = أنا كما النجم وأنت مصدر إشعاعه
وصلاة ربي على محمد وأنا بختم = صلوا على المصطفى المختار وأتباعه