العمـر فانـي والليالـي مدابـيـر=ودنيا البنـادم ماعليهـا حسايـف
الله جعلهـا للبـنـادم مشـاويـر=أحدا هبط وأحـدا بـدا راس نايـف
واللي زرعها بر مايحصـد شعيـر=واللي زرعها شعير مالـه خلايـف
ولا تنتقارن سكـة الشـر بالخيـر=ولا تنتقـارن بالثقـال الخفـايـف
ومن لا يحوش المرجله يالمناعيـر=بأول شبابـه والمراجـل وظايـف
ماحاشهـا لاشـاب قـدم المقاديـر=ركايبه من دونها أمسـت نكايـف
وبعض المراجل وضعها وأمرها غير=في وضعها لانـي مـورا وعايـف
يبدي لها فـوق الرياجيـل تأثيـر=قولت سلام بهـا عليهـم كلايـف
ودون اللـزوم يقدمـون المعاذيـر=ولحتجتهم جرفـا هيـالا مهايـف
وقت الشدايد عنك أبعد مـن النيـر=وقت الرخا حولـك قريـب ولايـف
ولا قول في بعض الرياجيل تقصير=عديت مابالعيـن فالوقـت شايـف
كلمةوعنـدي للسواليـف تبـريـر=أقولها مانـي مـن الحـق خايـف
أمايعيش الرجل فـي عـز تقديـر=ولا بلا عيش النفـوس الضعايـف
وأهم مابـه يـوم ناقـف طوابيـر=وكلا يلاقـي ماكتـب فالصحايـف
يارب تجعل لي من الذنـب تكفيـر=لا جاء نهار(ن) فيه نجمع طوايـف
عبد(ن) فقير لرحمتك من زمهريـر=عساك لي يـارب راحـم ورايـف
وختامهـا عـداد ماغـرد الطيـر=على النبـي صـلاة رب الخلايـف