ان كان يا بن حميد شفك مغاتير=والقلب في حرش العراقيب ميلاع
عندي مجرد راي يا مير لا غير=والا أنت رايك كنّه الجدي لمّاع
اليا سمعت العشب جاله تباشير=وجاله على الحد الشمالي تشعشاع
ثم اكتست باللبس حمر الدعاثير=عقب الدهور الممحله عشبها فاع
وتشابكت فالروض روس النواوير=لا طقها الغربي تمريع تمرياع
وفيها الثلاث اللي تقول التعابير=الماء والخضرة وزينات الاسناع
ابطح لهن يا ميرنا بالمحادير=ولا به عن الصمان والحد مرجاع
يازين مقدمها يخض المخاضير=يوخذ بها عبة على كل مرباع
والوضح شفٍ للرجال المناعير=عزل الشيوخ اللي لها فالكرم ناع
رثم الخشوم اللي تهوم المشاوير=عراض الخدود منومسة كل صعصاع
وُساع النحور أرقابهنه بواكير=سند الغوارب والعراقيب هزاع
قفز الظهور عراض سلت المواخير=تِلقى مع العتبان ولا مع سباع
عفراً تصخر نازح الدار تصخير=على حارك القعدة تشمع تشماع
فيها مصاغيرٍ وفيها معاشير=الضغط والسكر اليا شافهن ضاع
منوة فداويٍٍ براسه صعاطير=يمشي على درب الطحاطيح ما تاع
واليا بدا فالجو عجّ ومعاصير=وتلافتـت لديارها شقح الاقطاع
ثم سنّدت ودروب اهلها مسافير=كلن يبي داره وللدار طماع
خلها تروج من المشاقيق للنير=وتاخذ على الصاقب وجذوان مذاواع
انته ولد من قاد روس الطوابير=لو الرحى يشهد شهد يوم الافجاع
يومن على ضده تدور الدواوير=دون الجهام لغالي الروح بياع
قلته مجرد راي يا مير لا غير=ولا انت رايك كنّه الجدي لمّاع
وان كان شعري حاصلن فيه تقصير=فالعذر منكم يا طويلين الابواع

يا قصيدي غن وأرقى فالطويـل العالـي =عادتك روس النوايـف والقمـم ترقاهـا
ما سقيتك في رحاب الصدر غير زلالـي =شجرة منهـا الظـلال وفاليديـن جناهـا
غن يا ورق الحمـام وهـات يـا موالـي=هات من وبل المزون ليا ضحك منشاهـا
لين اسطر فالـورق در الكـلام الغالـي=من ينابيع الضميـر اللـي قـراح ماهـا
شاعر مـا يـارد الجمـة بـدون حبالـي=وان ورد بل الكبود الضاميـو وارواهـا
يا سلام الله علـى نبـع الكـلام الحالـي=والهجوس اللـي تبايعنـي وانـا مولاهـا
كل ما دكـت هواجيسـي وجـاد خيالـي=اعشبت بيـد المعانـي والنفـل يغشاهـا
شوش يا راسي وأبا احذف غترتي وعقالي=موقف يفـرض عليـه وقفتـي وأحماهـا
كيف ما سطر كلامي وافتخـر فاقوالـي=واتنومس بالبيـوت اللـي علـى معناهـا
مهرتي تجمـح ولـي فالطايلـة منزالـي=والعزاوي والسيـوف المرهفـه تشعاهـا
قاضب خطام الحقايـق والسعـد يبرالـي=والفعـول مثبتـه واللـي نشـد يلقـاهـا
لي حوالي شهر مغلق شاشـة الجوالـي=مبتعد عن زحمة العالم وعـن ضوضاهـا
عاقد حبـل العزيمـة والسبـب كالتالـي=لابتي وفعولها اللـي مـا أحـد ينساهـا
كيف ماسوق المدايـح والكـلام الغالـي=وارفع البيرق واسوق المدح في طرياهـا
لا بتي زبـن المجنـا والذليـل الجالـي=والوحيد اللي يديـن العـون مـا يلقاهـا
لابتي سقـم الحريـب ولطمـة العيالـي=سعد من عنز على الهيـلا ومـن ينخاهـا
لا اشتعل للحرب نار وعـودت للصالـي=واتفتح باب العـزاوي والرمـك وحداهـا
لاعوى ذيب المجاعة فالشعيـب الخالـي=وانكفت خيل الحفيـف وعزوتـي تقفاهـا
بشرو ذيب الخلا يقنـب بصـوت عالـي=للذياب اللـي تجـاوب فالخلـي بعواهـا
والله لتشبـع بعـد ينـذاق مـر وحالـي=من وقايع عـزوة عتيبـه بصـف عداهـا
مـا كسبنـا طيبنـا بالحكـي والدوفالـي=غير بالسيف الحـدب ومهارنـا وحداهـا
لين بنينـا البيـوت اللـي لهـن ظلالـي=في سنام الديـرة اللـي رمحنـا يحماهـا
في قرارة نجـد قـدام الحكـم والوالـي=ماش حب خشوم غيـر بسربـة ننخاهـا
لين زحزحنـا الجبـال الشـم والاقذالـي=والجمال اللـي تهـادر بالطغـى سقناهـا
ما تخضعنـا لـو الـدم الحمـر وشالـي=المذلـة وصمتـة سـوداء ولا نرضاهـا
يوم سـوق الهـدو للمربـاع والترحالـي=والقوي يفرض على القصرة ثمن مرعاها
ما مسحنا جوخة الشيخـة قديـم وتالـي=لو سموم القيظ ترمينـا علـى رمضاهـا
يوم ميحات الدلي والجيـش والزرفالـي=والليال الموحشة والخوف مـن ظلماهـا
فعلنا نـون يجـي لـه فالبحـر زلزالـي=بالجموع اللـي فعايلهـا عطـور لحاهـا
في جبين المجد بصمتنـا فخـر وتلالـي=مثل ضوح الشمس في كبد السماء مبداهـا
لين جاء عبـد العزيـز محقـق الامالـي=وانطفت نـار الفتـن والله دفـع بلواهـا
بدد الظلمـة وغيـر مجمـل الاحوالـي=وحد بدود الجزيـرة وانتهـت فوضاهـا
وازهرت به نجد مثـل الغيـث بالهمالـي=واعتلى مع رايـة التوحيـد فـي علياهـا
لين صـارت مملكتنـا بالفخـر مدهالـي=وارقبـت فـوق الثـريـا درة نفـداهـا
في ذرا آل سعود كف البطـش للمحتالـي=وجنة يلقى رغدها مـن مشـى لرضاهـا
والختام أزكى صلاة وخيـر مـا ينقالـي=بالرسول اللي لطم عين الجهـل وأعماهـا

ابدا بذكر الله قبل بدع النشيد=ومن بعد ذكره نبتدي بجزالها
ويزين نظم الشعر ويزين القصيد=في الحلة اللي طيب الله فالها
في مجلس العبود والمجد التليد=اخوان عبده طيبها وجلالها
عبد الله العبود ابا الرأي الرشيد=انشهد انه كل جزلة نالها
شيخ الشيوخ اللي عن الزايد يزيد=عسى لياله ما يغيب هلالها
ولو اطلق الاشعار طلق بدون قيد=لانهى القصيدة كلها بكفالها
في مدح ابو فيصل ولا غني جديد=له سيرةً كل العرب تصحا لها
سيرة رجل مع قيفٍ يضد الضديد=الآد القثامي طيبها برجالها
قبيلةً ما مدت المد الزهيد=برجالها ولا ذخائر مالها
ابشر يا بو فيصل فلا والله ازيد=لو كان مابه حاجة نسعى لها
من ينكر التاريخ ابد ما يستفيد=تاريخ عز لابتك وابطالها
يقول ابو فيصل هلا والليل عيد=عد المزون وعد وبل خيالها
يا مرحبا وعداد ما أخضر الصعيد=ترحيبةً ما ينقفل مجالها
ترحيبةً تبقى عذيه ما تبيد=مثل العسل من خاطر اللي قالها
عز الله اني يوم ارددها سعيد=ولا اقصر عن اللي حاظرين حبالها
يا مرحبا في مرحبا يا بن حميد =يا فارس الهيلا ويا خيالها
يا بندر النايف ويا الرأي السديد=يا بن الرجال اللي يظل ظلالها
يا ابا العلا يا مرحبا ترحيب أكيد=يا مقدم اللي جمل الله حالها
وحييت يا بن عديس يا نعم الحفيد=يالآد مشيب والسعد يبرى لها
وترحيب وافي للقريب وللبعيد =لشيوخنا اللي طيبٍ منوالها
اهل الوفا والطيب والفعل المجيد=عتيبه الهيلا عزيزٍ جالها
وقت اللاقا تشرب فناجيل العنيد =وسيوفها الناموس حدر ظلالها
بالدين والنخوة وبالسيف الحديد=يا عنك محدن شاربٍ فنجالها
اسباع غاب ما تكاد الا تكيد=ترمي العشا بكفايها واقبالها
وليا التقى الجمعان واحتز الصعيد=ناموسها يؤخذ بحد سلالها
وباقي القبايل فعلها فعل يقيد=سمو القبايل ما نغط أفعالها
وصلوا على اللي ساد وأرخى كل سيد =عد السعة وايامها وليالها

صقر العروبه حبيب الشعب عبدالله=رمز الشهامه ورمز الطيب في جيله
خادم لبيت الله ومسجد رسـول الله=الله يعـزّه ويكتـب لـه تساهيـلـه
شفته وشفت الفرح بعيون خلـق الله=يومي بكفه وكل الناس تومـي لـه
اناشهد انه زعيم الخيـر بـاذن الله=بالخير يسعى ويسعى الخير ويجي له
الخيرفي مجلسـه يبـدا بذكـر الله=ينصت لشرحه بعد ما انصت لترتيله
للشعب مخلص وقلـبه ملخـصٍ لله=ماضنتـي فيـه مخلـوقٍ يحاليلـه
الحكم حكم الوفا والديـن ديـن الله=ركعه وسجـده وتكبيـره وتهليلـه
حَب اليتامى وهم حبّـوه بامـر الله=ومن حبهم دمعته طاحـت بمنديلـه
ياكثـر عدلـه وكثـر مراقبـه لله=ومن كثرعدله جميع الناس تدعي له
حتى عدوه سمـح لـه واعتقـه لله=اخلـى سبيلـه ولادوّر محاصيلـه
مادام شيٍ يخصـه فالعـوض بالله=تفكيره اكبر من الوقـت ومهابيلـه
لكـن دون الوطـن والديـن لاوالله=يشيل حملٍ عجز كم واحـد يشيلـه
يضرب على هامة الظالـم بحـدالله=راع المحابيـل ماتمشـي محابيلـه
عليه عين الرضا واقول ماشالله = غيثٍ تعلّى ورشتنا هماليله
كل القرارات عنْونهـا بعـون الله=يصدر قـراره وتسعدنـا تفاصيلـه
يمد كف العطا والـرزق عنـد الله=اوامر الخير تشرب مـن فناجيلـه
هـذا ملِكنـا وقايدنـا بـشـرع الله=اتموت حكام ماوصلـت مواصيلـه