يالله ياللي ترتفعلك يدينا=باسمك نردد بالدعاء والتحيات
يالله جملّـنا اليامن حكينا=اسمك يعطر منبري والمنصات
للمجد حنا والمعالي رقينا=مبطي وحنا شايلين الثقيلات
فوق المعالي من قديم استوينا=افعالنا بالوقت ماهن خفيات
كن الوطى يسجد اليامن وطينا=وياما لنا في سالف العصر آيات
مثل الجبال الراسية لانتخينا=نبطش وحنا للمسالم سلامات
عتبان حنا لانوينا نوينا=البيرق اللي تنكسر منه رايات
مادام ( بالهيلا ) قديم اعتزينا=فيها لنا صوله وبالوقت جولات
حنا كسبنا المدح فيما جنينا=وتلقا لنا في كل موقف علامات
على الكرم والطيب حنا ربينا=يفخر بنا التاريخ في ماضيٍ فات
ماغير ربي والله انا خشينا=اللي ختم بالدين كل الرسالات
للموت حنا بالمواقف قوينا=ولانهاب الموت وقت المهمات
مبطي وحنا بالجزيرة سعينا=يومن كلن ماعرف كيف يقتات
من فوق قبٍ للملاقا عدينا=اليا نوينا مانهاب الصعيبات
وكل القبايل فعلها مانسينا=مافيه زودٍ عن هل الطيب بالذات
واليوم بالشرع الكريم اكتفينا=فضلٍ من اللي معتلي بالسماوات
في ظل حكام الجزيرة نشينا=ال سعود اليا حصل فيه ميلات
هم الملوك وغيرهم مارضينا=ومنا لابومتعب سلام وتحيات
عبدالله اللي في ذراه احتمينا=اسمه تعلا لاتعالن الاصوات
وولي عهد من كرمه ارتوينا=سلطان سلطان السخاء والكرامات
في ضل حكام الجزيرة بقينا=وفي حكمهم نلقاء الرغد والمساوات
حنا السيوف اللي معاهم مشينا=معهم لنا في سالف العصر وقفات
وماني معدّد فعلنا . وش خذينا !=والمدح ماهو في جميل العبارات
يكفي عن التعبيرموقف حدينا=تموت روحه لكن العز مامات
مبطي فخرنا . ياعرب وش علينا=ومدحي لربعي لايجي فيه شرهات
ومن يوم حنا بالمزاين بدينا=حنا بتاريخ المزاين نهايات
جبنا عطايا الله وحنا عطينا=نبذه عن الهيلا فكل القنوات
يعني ختام المسك . والطيب فينا=واختامها على النبي الصلوات

اخوي الغالي نجـــم

اشكرك على مرورك الذي عطر صفحتي باختيارك لبيت القصيده ..