سر ياقلم ,سطر اجزال المثايل =من هاجسِ ( كِيًف )على كيف ما طاب
يبني البيوت المحكمات الجزايل = اللي لها في سبع القاع منساب
ولاخير في شعر الحيل والمحايل = اللي يداري به هوى كل نصاب
والمدح في روس القبايل فضايل= وللعز ياشعرِ يشوش ولا عاب
في مدح شيخِ من كبار الحمايل =راع الشداد اللي ينومس وينهاب
شيخِ على عهد الجدود الاوائل = ماصدروا مرسومه العام بخطاب
شيخٍ ثقيل ويرتكي للثقايل = الهيضل اللي يودع المدح ينساب
هيضل مدابيس الوغا,, والغلايل = له ماقفِ يأمن به القلب لاهاب
راع المقام المعتبر بالدلايل = اللي فزع لي يوم الادباش هراب
أوما ,, على الحدين راع الصمايل = وضرب بحد السيف لين الصفا , ذاب
لعل ابن صلال راع الجمايل = تبطي به الدنيا على الارض ماغاب
ابو محمد بالامور الجلايل= يسوق جاهه للرفاقه ,, والاجناب
يسوق جاهه مثل سوق المخايل = اللي تهل الماء على بيد , واشعاب
راع الجمايل يستحق النفايل = اقولها و حنا , بني عم واقراب
يستاهل الطاله على كل طايل = وترفع له البيضاء بلا عد واحساب
ابو محمد شوق سود الجدايل = بنت الشيوخ اللي يهدون الاصعاب
هياضله ,, تلطم عيا ,, كل عايل =وفي المعترك يمضون ماهم بهياب
ويوم القبايل والقبايل تشايل = وعزومهم تروي نهم كل معطاب
اهل السيوف المرهفات الصقايل = اهل الجهام اللي يفكون الانشاب
اهل النخا واهل السخاء والفضايل = ما عمدوا , الحارس , على مدخل الباب
ياشيخةِ ما دنستها الرذايل= مقدارها من فوق هملول سحاب
مادنسوها موقدين الفتايل= اللي يورون القديحه بالاسلاب
تهبأ ,, أذممهم عن جناب الاصايل = وعن لمزهم عما يقولون ( ياعقاب )
بصم لهم بالكار سبع القبايل = ما كفت السوده اليا رأس مشعاب
وانته يابن صلال وافي خصايل = قدرك تعلا من على رأس مرقاب
والله ما اسمع فيك يابا الجمايل = غمرتني بالقدر والصدر مرحاب
انت الذي لولاك صارت هوايل = راحت حياتي بين مايح وجذاب
وانتم هل المعروف واهل الفعايل = اليا نصاكم , شايل الهم ماخاب
معروفكم عندي يزيد الحصايل = ومن لا شكر معروفكم قلت كذاب
وقلبي على مدح الشيوخ ايتمايل = والله اليبطي مادح الشيخ ماتاب