الهيـــــــــــــلا *** منتدى قبيلة عتيبة - اطهــــر بلــد واطــلـق ملــــــك

اطهــــر بلــد =واطــلـق ملــــــك

الا يالله يارب العباد الواحد القهار=تعز المملكة وتعز قائدها أخو نوره
بلاد نهجها التوحيد والقائد من الاخيار=ابو متعب صليب الرأس في فعله وفي شوره
عديم الوصف محمود الفعال الصارم البتار=سطع كالبدر في وسط السماء كلاً شهد نوره
ليا منه بسط كفه بشر أو خير جات كبار=لراع الخير خير وللعدو لطماً لخنفوره
يكيل ولا يميل ولا تزعزح صار مهما صار =يشيل الكايده ويبرك المخطئ على زوره
أله قيمة وأله شيمه وأله هيبه وأله مقدار=وأله في قلوب خلق الله رصيداً صعب تصويره
ليا منه حضر يا قف له العالم قدر وإكبار =أحد ياقف من الرهبه وأحد ياقف لتقديره
من أقصى الشرق لا قصى الغرب من مسلم ومن كفار=لو أنك تسئل أي شخص قال أكيد من غيره
أجل ما هوب عبد الله معش الضيف عز الجار=أجل ما هوب من يمناه بالجزلات مغموره
أجل ما هوب غياث الثكالا ملتجا القصار=ابن عبد العزيز اللي على وقته اخذ دوره
اله مدات خلت عالماً جوعا من التجار=دول وشعوب عاشت بعد فضل الله وميسوره
واله شيمه عن الهفوات والزلات وأخذ الثار=ولا دور عذر من ناس لو ما هي بمعذوره
يفك قيود من دارت به الدنيا وفكره دار =ولو كانت ذنوبه واضحه كالوح مسموره
يعرف أن الله اللي قدر الأجال والأعمار=وخلق الله بامر الله منهيه وماموره
ملك وابن ملك وابن ملوك مالها حصار=ولا يمكن يوف الشعر مهما زاد تعبيره
جمع كل المكارم يوم غيره كم ملك جبار=ونطق بالحق يوم أفصح فصيح أنصك حنجوره
حشى لله مافا الكون كله مثل دارى دار =ولا يوجد ملك مثل أبو متعب بأي معموره
أجل ما هي بلد مكة ومكه مولد المختار=أجل ما أنزل بها القرآن سوره من بعد سوره
أجل ما هي بمن يرفع بها الأذان بالأسحار= وولى الأمر فيها ياخذ من الشرع دستوره
أجل ما هي بمن يا من بها الخايف من الأشرار =وبامر الله محروسة وبامر الله مستوره
قبايلها من أحفاد الصحابة صفوة الأحرار=عرب وأصل العرب منهم وفي التاريخ مسطوره
ليا رحت الجنوب أطوار وأن رحت الشمال أطوار=ولن جيت لو سطها شفت فيه أسود ونموره
يا عالم يا بشريا ناس يامن تسمع الأخبار=ويا من تشهد العالم وعبر الصوت والصورة
عن ايمنا عن ايسرنا نشوف الظلم جهار نهار=شعوب مجوعه وشعوب بالأقفاص محشوره
أحد ياكل وأحد يوكل وأحد يكسر وأحد كسار =وأحد يصلب وأحد يشنق وأحد يضرب بما صوره
,احد سارق وأحد يسرق وأحد يجزر وأحد جزار=وأحد ينكس على رأسه وتظهر كامل العوره
وأحد يسلب من أعز الذي يملك بدون أنذار=حوار الديمقراطيات أبو عطفه وشرشوره
جميع الموبقات السبع مشهودات بالأنظار=صور بني بشر وأعمال ممسوخه ومسعوره
وهذا مصداق قول الله بإن الناس كالأحجار=قلوب من حجر لكن حجاره غير مفطوره
لذلك قال عز وجل مال القاسي الا النار=وكم موقد على تنور وأهلك وسط تنوره
علينا نحفظ النعمة بحمد الله والأذكار=ليا منا شكرنا الله زاد الله من خيره
ولا يالله يارب العباد الواحد القهار=تعز المملكة وتعز قائدها أخو نوره

قصيده = شعيل سرور الزلامي