الهيـــــــــــــلا *** منتدى قبيلة عتيبة

السلام عليكم ورحمه الله وبركاته

اقدم لكم احدى قصائدي الغزليه ان شاء الله تنال على رضاكم

جتني بحلمي تسأل الحال وش فيه = ودها تطمن وش جرالي بالايام
عقب الغياب اللي مضى مع لياليه = حالي تدهور واكثر الوقت ما انام
شفت الحزن بعيونها بان خافيه = واسترسلت بالدمع من كثر الاوهام
سألتها ليه الجفا دوم تبديه = قالت ترا ما هو جفا يابن الاكرام
لكن واقعنا عسى الله يسويه = لو صد فيه اهل الهوى طيرهم حام
اللي منعني عنك حكما اعانيه = والا انت نور العين والرب علام
متى على الله نلتقي قولي اوكيه = قالت ظروف وكل شي له احكام
قلت اسمعي هرجا على الكل ما ابديه = هرجا كتمته ما درى فيه لوام
عهدا عطيتك ياه ماني بناسيه = لا والذي سواك قايد للاروام
والهم من فرقاك للحال طاويه = شوفي بعينك باقي جلد وعظام
قالت تصبر والصبر دوم يقفيه = امر الفرج والرب داري بالاحكام
قلت اوعديني بعدكي ما تعيديه = وتسعي لوصلي مثل وصلك للارحام
قالت وعد باعطيك والله ما خليه = بس اعذر ظروفي ترا الوقت ظلام
قلت ابشري بس البعد لا تخليه = يسوقني يابنت في درب الاعدام
واللي خلقنا ودايم الوقت نرجيه = اني بوسط القلب باني لك خيام
وضميتها والدمع سالت مجاريه = متخالط بالدم من عدة اعوام
وفزيت من نومي وانا اقول لبيه = والا السوالف يا عرب كلها احلام
ما غير اهوجس كل ساعة بطاريه = مثل الغريب اللي من الوقت منظام
مدري جفا والا زيادة مشاريه = وانا ما طاوع كل حاسد ونمام
ما قول غير الله يرده لغاليه = واسلى اليا شفته ويبرن الألام

وسلامتكم ،،،،،،،،

مجاهد محمد ظاهر الخضري