انا من العتبان ناديت رجال = وايضاً معه من حرب رجال ثاني
نبي لنا جلسه على كيف بدلال = وسوالفٍ فيها قصيد ومعاني
شعرٍ نقي ماهو تصانيف جهال= تعبير فن معاصرين الزماني
هذا الهدف واللي طرالي على البال= شوف الرجال معربين المجاني
من خيرت الشعار ذربين الأفعال = عندي لهم تقدير سر وبياني
من خيرت العالم عوارف وعقال = وبالمرجله مقدارهم مايهاني
والناس كلٍ له مكانه ومنزال =والأرض كورتها رفاع وطماني
هذا مثل من ضمن الأمثال ينقال =وساس الحجر يرفع حصون المباني
مني لهم تقدير في كل منوال = يشهد على مضمون قلبي لساني
ارسلتها يم النشاما بجوال = اطلب زيارتهم يجون بمكاني
لاسيروا يمي وشاهدت الأبطال = فرصه سعيده مثل عيد رمضاني
وجهت عشر ابيات من هيض الأمثال = وذكرتلي موجز صحيح وكفاني

يعيش راعي دلةٍ مالها اشكال = من فايدت فنجالها مانساني
من يوم دق بهارها عبر الأرسال = صكة عليّ بريحة الزعفراني
لو دونها حالت مسافات الأميال = هب الشمال بريحها لين جاني
ومنها على الهاتف تقهويت فنجال = هيله من الحبشي وبنه يماني
من موردٍ ياليتني منه مكتال = لاشك صعب السلم عنه ايحداني
يكتال منه اللي ليا اختار ماعال = وليا وسم ماياسم إلا السماني
امثال ابو سلمان كساب الأنفال = اللي يحاكينا بسحر البياني
له سمعةٍ تبقى الى تالي التال = ابين من المشعل على ضلع اباني
فرايدٍ غنت بها الناس موال = يلجا لها اللي من همومه يعاني
يابن زويبن جعل تفداك الأنذال = ماعدك إلا واحدٍ من خواني
نبي نزور معرب العم والخال = اللي على الهاتف دعاك ودعاني
ناخذ لنا عند اصبح الوجه مقيال = حنا شفاويه وهو مرحباني