لو اقدر آصلك يانجم ٍ لمعت بسماي=الارض ما أظن تعرفني ليا جيتها
من دونك الجاذبيه .. والنجوم بفضاي=اكثر من وجيه ناس ٍ ماظهر صيتها !
ياليتها من علوم ٍ مثل هذي وجا=كان الفرص يوم جتني .. ماتعديتها
بلاي من شرهة ربوعي وفرحة اعداي=هذي هي الساعه اللي ما تمنيتها
آثرك مثل السراب اللي مايقطع ضماي=لو اني اتعبت رجليني .. وعنّيتها
درّ في مدارك وانا ادّرج مكاني اخطاي=بعد اوقفت خطّر ايامي وداريتها
والا طموحي ! بعيد ابعد من اخر مداي=ولو انها بالعزوم / عزومي ابليتها
لكن يآسي غلب على حقيقة رجاي=وهزيمتي من مرارتها .. اسلتذيّتها
وعلى كثر مانسفت من الحقايق وراي=تموت الاحلام لكن ما انهدم بيتها
مدري خطاك انت والا الحظ والا خطاي !=سؤال .. منه الاجابات استشفّيتها
علوم .. والونّه المتفجره في خفاي=غفت على وسادة ضلوعي وصحيّتها
وبقت لي الذكريات اللي عزاها عزاي=الله من ليل .. سرتني وسرّيتها
هي مكسبي من مقاديري ورحلة شقاي=وهي راحتي لا اشتكيت الها وناجيتها
معها .. واسولف لحالي من خلاي بخلاي=كم خففت ضيقة ٍ فالصدر كنيّتها
يانجم ليتك تغيب .. ولاتكدّر صفاي=يكفي عليّه جروح ٍ منك عانيتها !
طابت .. ولكنك اللي ماتدور دواي=عاشت ماخليتها .. وابطت ماداويتها
ماهوب انا اللي يجي ويروح من غير راي=علاقة عيوني ب.. نورك قد انهيتها
اللي خسرته دفاء ناري ف.. بارد شتاي=واللي كسبته مبادي ٍ ماتت / احييتها
هذا انا في عيون اعداي قبل اصدقاي=اموت .. والدمعه الزرقاء ماهليتها
الا على من قدر يكسب رضاي وثناي=هذا حياتي عشانه .. ماتغاليتها
انهيت معك البدايه وابتداء منتهاي=والجمره الحيّه ب.. كفيّ ضمّيتها
ماني بعايش على لعلي وياعساي=ان ما قدرت آدرك الامال / خليتها !