راحو الرفاقه والشقا ماله حدود=واشيب عيني شيبها يوم شدوا
اصيح واصوت ولافيه مردود=ياسامعين الصوت بالله ردوا
لو الكلام يطير مع هبة النود=جريت مسحوبي على نايف الدو
وارسلتها في غيمةٍ برق ورعود=تمطر على اللي للوازيم سدوا
صحبة شرف ماعابها كل منقود=ومن العلوم الغانمات استمدوا
ماهي بصحبة خاين وصال وعهود=اللي ليا جوه العرب ماتغدوا
مااخاوي الهلباج لو كنت محدود=الناس قالو بالمثايل وعدوا
مخاوي اهل الجود يضرى على الجود=واللاش يبغى صحبة اللي تردوا
ناسٍ ترحب بي على المسك والعود=ولا هل الصدات ياجيت صدوا
والصاحب اللي وافي وطيب جدود=أشريه لو كل العرب فيه ضدوا
واصحابي اللي قدرهم دايم يزود=لاكبرت القاله علي استعدوا
واقول يااصحابي على الوعد موجود=وانتم على درب الطويلات جدوا
من بيننا حبل المودات ممدود=أمد لاارخيتوا وإذا ارخيت مدوا
واهل النميمة في نواياهم السود=يبقون بين حدودهم ماتعدوا
يااهل الحسد بالمجتمع مالكم فود=توبوا وهدوا من غثا الوضع هدوا