لبارحة سهران مع نجمة سهيل = واجريت من عيني كثير الدموعي
وقلبي كفخ ثم لجلج الضلع بالحيل = ومع لجته لجت جميع الضلوعي
ورجلي خطاها بالمشي صابها ميل = تاطى على جمرة وقلبي يفوعي
دكتور طمني عساها تساهيل=هذي ثلاث سنين زادت اسبوعي
دكتور وش باقي بعد ذا التحاليل= ضيعت مهنتكم ولا به سنوعي
طفلي صغير وذاق سبع الغرابيل= ليله تناهيت وقليل الهجوعي
جرعته انواع الدواء صبح مع ليل= وذاق المرارة غصب ولاهوب طوعي
دكتور وش باقي ترى مايل الكيل= عشيتني هم ومعه زاد روعي
يالله ياربي ومهلك هل الفيل= يامدبرٍ أمره على كل نوعي
هذي دموعي غرقن المناديل = ادعيك ربي في سجود وركوعي
وأمه على راسه من عيونها سيل= تدعيك ياربي عظيم السموعي
تشفيه ياربي وياسامع القيل= أمن على دعواي وقت الهجوعي