المستريح اللي من العقل خالي=ماهو بلجات الهواجيس غطاس
ماهوب مثلي مشكلاته جلالي=ازريت اسجلهن بحبر(ن) وقرطاس
ياصاح أنا ما اخفيك عن علم حالي=وعن حاجة(ن) تثر على مجرى الانفاس
جرح الزمان اللي من اول وتالي=يشرق شروق الشمس ولبعد الادماس
من زود ماهو عود مافيه جالي=ولا له حدود ولا مراسم ولا قياس
مايدفن الزلات كثح الرمالي=ومافيه يوم(ن) يلتئم جرح الاحساس
ولو زاد همي خابر(ن) راس مالي=لي عزوة(ن) ارفع بطاريهم الراس
ماينثني عزمي ولاني لحالي=حتى لو إني من عنا الوقت منحاس
صلب الرجال اللي تروم المعالي=واللي لهم بين العرب طيُب الساس
تبقى البحور عظام وتبقى الجبالي=تشمخ ولا يثر بها ضربة الفاس

المستريح اللي من العقل خالي=ماهو بلجات الهواجيس غطاس
ماهوب مثلي مشكلاته جلالي=ازريت اسجلهن بحبر(ن) وقرطاس
اثقل عليُه من ثقال الثقالي=الشامخات اللي مداهيل قرناس
الراسيات الطايلات الجبالي=اللي تعدا الجاذبيه بلا قياس
الله واكبر ياسهوم الليالي=صارت علي أحد من حد الامواس
ماعاد عندي حيلة(ن) واحتيالي=قمت اتقلب مثل بن(ن) بمحماس
على سنا نار(ن) صفقها الشمالي=جمر الغضا مابرده كل نسناس
اللي جرى للبن الاشقر جرالي=كل الجروح الكايده توجع الراس
يالله ياوالي على كل والي=ارفق بحال اللي دخل بين الاقواس
انته ملاذ الروح والاتكالي=يوم الحساب ويوم الارياق يباس