ظلمة الليل طالت يا نهار الشروق=كيف يظهر صباح الخير بعد الغياب؟
كل عرقٍ بجوفي للحقيقه يتوق=لكن أكبر سؤال يهد حصن الجواب
كيف فزعة موالي للموالي عقوق؟=كيف أبترك رفيقي للسما والتراب؟
وإن تركته لجرحه ما بقيت الصدوق!!=والبشر كلهم من حقد وإلا عتاب
نظرةٍ من صغار السن لأهل الحقوق=عندي أبلغ عباره تنقرا في كتاب
ودمعةٍ من عيون الطفل سالت سبوق=فعلها في ضميري مثل فعل الحراب
لذة النوم عيت لا تجي لي بموق=كل ما أذكر رفيقي والخطا والصواب
لو تظاهرت عادي وسط جوفي عروق=نابضه بالوفا من رغم كل الصعاب
لو تغير بكل الناس منطق وذوق=ما تغيرت لو الكون يصبح خراب
وكل ما شفت غيمٍ شق وجهه بروق=قلت يا خير جعلك في قدوم السحاب
من صدوق الحيا يا جعل ربي يسوق=سقوةٍ للدريك اللي من العمر طاب

صح لسانك قصيدة جميلة

لاهنت ..تحياتي