وحده بوحده والليالي توافيق=انكرت فالخوه وانا لازم انكرك
عوايدي ماهي بحقر المخاليق=لكنك انته تجبر الناس تحقرك
ياما على خوتك اغني طواريق=واجيب عطر العز دايم واعطرك
ماقولها منه ولا احب التلافيق=ياللي بفعلك ردى الحظ جابرك
لاجاء وقت الضيق ابوابك مغاليق=وتصنع الاعذار لكني اخبرك
وقت الرخاء رجال بكثر الخثاريق=تهابد المجلس من ايمنك لايسرك
صبري تعدا الحد والله مااطيق=اشوفلي ناس(ن)عديمه تعبرك
ويش انت مطفوق ومصاحب مطافيق=وانا احمد الله يوم بينت ساترك
الصحبه اللي ماتوثقها مواثيق=مثل المرض يجتاح جسمك ويدمرك
ابحفظ وصات ابويه فالمعاليق=يقول لاتهدم بيوت(ن)تعمرك
واحرص على خوه وجيه المطاليق=اللي لاجاء طاريك بالخير تذكرك
ابحفظ وصاته واكب المطافيق=اللي ليا من شفتهم ضاق خاطرك