ياقلبي اللي رهين الشوق والهوجاس حاديه=محبوس في همّه وسجن الوله والإنتظارى
يقول من غبر ليه إذا سألت وقلتله ليه؟!=وش سر هذا السهر والدمعتين اللي تبارى؟؟
نزف الجروح اغرقت بحر الصبر وادمت شواطيه=لاعاد تبحر بنا يكفي تهوّر وانتحارى
رميتني في بحور الحب وانا زاهدٍ فيه=يرضيك تمضي ثلاث ايام وعيوني سهارى؟!
اصارع امواج طيشك والغرق بانت مواريه=إلا متى مالهذا المد جزرٍ وانحسارى
هذا الهوى فضّها سيرة لعاد تجيب طاريه=خايف جنونك يودينا لمستشفى شهارى
قال انت طاوعتني فأوّل سنين الغي والتيه=وهالحين ماعاد لك رجعة ولاحتّى اختيارى
درب مشيته معي لازم توصلني لتاليه=الامر خارج من ايدينك وانا رب القرارى
قلت انت لاتلحق المقفي ولاتتبع خطاويه=نفسي عزيزة ولاترضى مذلّة وانكسارى
واهل الهوى قالوا اللي مايعرف الصقر يشويه=ماارضى المهونه وعندي عزّة النفس انتصارى
قال انت ودّك تخفّي شي وعيونك تبدّيه=شيٍّ يدارى عن العالم وشيٍ مايدارى
لاتنكر الغالي اللي من صميم الذات تغليه=مستوطن القلب حتّى لو عن عيونك توارى
نسيت حلو الكلام اللي من السانك تغنيه=من الاماكن وحتى هل رأى الحب سكارى
قلت العفو مانسيت وكل شي بحطّت يديه=ولا اقلعت رحلة الاشواق من ارض المطارى
رجعت طاوعت قلبي والصراحة مااقدر اعصيه=انا مسالم ويربطني معه حسن الجوارى
ياداعي الشوق اجيك بلهفة العشاق لبيه=وبكل رجفة خفوق وحيرة قلوب الحيارى
يازين هاك الخفوق اللي يحبّك لاتخليه=من يوم شافك وهو يمشي معك سر وجهارى
ظلّى من اوّل معك يسرح وبعد العصر اضوّيه=وهالحين خاواك لايفرقك ليل ولانهارى
من لوعة الشوق حتى نسمة الاسحار تكويه=شوفت عيونك وقربك جنّته والبعد نارا
وش صار ياصاحبي لاتهجر العاشق وتجفيه=لايفرح العاذل ولاتشمت الناس الغيارى
يامن يوديه هذا العلم عنّي من يوديه=ويقول انا حيل ميّت في غرامه باختصارى
انكان زعلان من هذي ومن هذي نراضيه=وعبر الخزامى نقدّم له تحيّة واعتذارى
وانكان شاريني انا بالذهب والدم شاريه=والله ماابيع الغلا واهل الغلا بيع الخسارى

المشاركة الأصلية كتبت بواسطة عبدالله الجـــذع (المشاركة 813971) هلال شاعر عظيم والعظيم الله سبحانه كل الأحرف خَجٌلت عن وصف اعجاب بـ/ـهذه المخمليه هلال نسخت بعض الابيات فالبدايه ولكن تراجعت اخيرا عند رؤيتي لباقي القصيده وهي بأعلى مستوى للجمال والابداع لايضاهى هو نصك اسمح لي بالاحتفاظ بـ/ـنسخه منها :) واصل وانا احد جمهورك محبك .

المشاركة الأصلية كتبت بواسطة مرزوق حمدان العتيبي (المشاركة 814843) .. . انكان زعلان من هذي ومـن هـذي نراضيـه وعبر الخزامـى نقـدّم لـه تحيّـة واعتـذارى وانكان شارينـي انـا بالذهـب والـدم شاريـه والله ماابيع الغلا واهل الغـلا بيـع الخسـارى .. لله درك يامبدع .. وصح لسانكــ