يا قلب لا تشكي وتكثر شكاويك=دنياك يا قلب العنا ما صفتلك
دنياً تدفك للخطر والشرابيك=ولافيه يومٍ فات جت وضحكتلك
حتى ايش لو تزعل وتصفق محانيك=ما اظن دنياك بوفا وقفتلك
تاخذ وتعطي مار وش عاد تعطيك= تعطيك هم وبالهموم اشتكتلك
مقصودها فاللي يضرك ويشقيك =لابدها فاللي يضرك سعتلك
وتدور اللي يزعلك ما يسليك=اما مشت لك فيه والا عدت لك
وصكاتها يا قلب ما اظن ترضيك=وزودٍ على الصكات دايم تختلك
اما اختلك بصاحبٍ لك يواليك=والا عن دروب النشاما حدتلك
دنياً غثيثه من غثاها تبكيك = واليا بكيت من البلا ما بكت لك
لكن يا قلبي عسى الله يعافيك=اصبر ولو دنيا الوفا ما استوت لك
واصبر على وقتك لو الوقت يوذيك=واصدق مع العالم ولو ما وفت لك
واحذر من العالم تبين خوافيك = ولا تشتكي للناس لو اشتكت لك
اشتك على اللي في دجى الليل يوحيك=اللي حياتك في يدينه وقتلك