يـاورد ياعـذب المشاعـر والاحسـاس=مايـذبـح العـشـاق غـيـر الاحـاسـيـس
طيفك غمرني صار لي مثـل الانفـاس=يشبـه ذعـاذيـع الـهـوى والنسانـيـس
انته تدلـل حـط تـاج(ن) علـى الـراس=خـل الهمـوم وخـل عنـك الوسـاويـس
تفكيـرك انتـه فـي مـوديـلات ولـبـاس=وافكـار غيـرك فـي خيـالـك محابـيـس
الثـغـر خـاتـم صايغيـنـه مــن الـمـاس=وعيون صقر(ن)من خيـار القرانيـس
مـن سبـب الفتنـه ومـن فـرق النـاس=الا الـــدلال وسـاحــرات النـواعـيـس
الـخـد بــرق(ن) لاح والـقــد مـيــاس=والبطـن ضامـر كنـهـا نــادر العـيـس
ثنتيـن فيهـا غيـر عـن كـل الاجـنـاس=نظـرت لميـس وحكمهـا حكـم بلقـيـس
لابــاس ياقلـبـي مــن الـحـب لابــاس=حتـى لـو ان همومنـا مــا لـهـا قـيـس
لاباس وان ذعذع من الشرق نسناس=تذكـر اللـي ديـرتـه مــن ورى نـيـس
وان كان ياقلبـي دخـل فيـك وسـواس=تعـوذ مـن ابليـس تسلـم مـن ابلـيـس
واليـا طـرالـي تـالـي اللـيـل هـوجـاس=جبت البيوت اللـي دعتهـا الهواجيـس
اصونهـا عـن مـدح خبـل(ن)وهـلاس=وامدح بهـا اللـي يكسبـون النواميـس
واكتب معاناتـي علـى صفـح قرطـاس=للغالـيـه ودمـــوع عـيـنـي امـاريــس
ماعاد لـي مـع سايـر النـاس مجـلاس=ماغيـر انـا وانتـي وشعـري مجاليـس
ماهمـنـي فـالـحـب عـــذال وانـجــاس=حـتـى لــو الـعـذال جـونـي كـراديــس
اعروق جسمي من عنا الوقت يبـاس=ارو الـعـروق الظـامـيـات الميـابـيـس
درب الخطـر لعيـونـك الـيـوم يـنـداس=وعذالـنـا مـثـل الضـبـاع الـمـراويـس
والشـوق مالـه بيـن الاحبـاب مقيـاس=طبـع الهـوى مالـه حــدود ومقايـيـس
بيـت الغـلا يازيـن مبنـي علـى سـاس=شامـخ شبيـه لبـرج رومــا وبـاريـس
كتبتـهـا وانــا مــن الـحــب مـحـتـاس=ليـلـي هواجـيـس وتـلاهــا كـوابـيـس
درب الهـوى مظلـم وراعيـه عسـاس=وش عقبت ليلى مـن الهـم فـي قيـس