قال العريدي .. يوم شاش و تغنـّـا = من طيب راسه طاب بدع التماثيل
الحمد لله جت على ما نتمنـّـا = من فضل ربي كلبوها تســـاهيل
الفال طيـّب .. والدعاوي قضـنـّـا = والطير رفرف عن سلوك المحابيل
يا طير رفرف .. و إسفهل .. وتهنّــا = جاك الفرج .. عقب السنين البهاذيل
أربع سنين ٍ من سنينك مضنّـا = لا عادها الله من سنين ٍ مهاويل
أربع سنين ٍ وأنت ياطير عنّا = من بيننا رجوى الليال المقابيل
خايف يجيك الحكم والموت منــّـا = وخايف يطول الصبر والحِكم ما قيل
أحد ٍ يبا شوفك .. و قلبه يحنـّـا = واحد ٍ يبا ذبحتك .. ويحط و يشيل
مير أشكر اللي ما يخيّـبك ظنــّا = الواحد المعبود مجري المخاييل
ثم الرجال.. اللي لها الشكر منّــا = اللي سعوا بالصلح .. نِعم الرياجيل
فيحان بن تركي زبون المجنـّـا = هو راعي الوقفات جزل المفاعيل
يوم إن جورالوقت جار وغبنـّـا = وصكات بقعا مرزمات ٍ مقابيل
من طيب راسه ما تمادى وتونـــّا = له وقفة ٍ يشهد لها كل حلحيل
له وقفة ٍ زاحت بلا الوقت عنّــا = وقفة شجاع ٍ ما عليها مداخيل
شال الحمول الكايده ماتثنـّا = ما حط دون الدرب عذر و عراقيل
وقّـّـف ابو نايف .. و فعله املنـّا = و انا اشهد إنه جمّل الفعل تجميل
كفو .. كفو .. كفو .. يوم إنه تعنــّـا = ما خابت الهقوه .. في نسل الحلاحيل
يا عنك مثله نادر ٍ في وطنّــا = اللي مثل فيحان نادر بها الجيل
يفداه منهو عن لزومه تدنـّـا = ويفداه منهو يجمع القال والقيل
واللي على ماله يدينه حدنّـا = ولعل يفدونه جموع الدعابيل
و يا شيخنا كان السنين امهلنّــا = وإن كان ربي مهّل العمر تمهيل
حنا على يمناك منـّـا و منــّا = تبشر بما يرضيك يإبن المشاكيل
حنا ولا من قلت حنا و حنا = تشهد لنا حد السيوف المصاقيل
هذا ومعروفك كبير وشملنّـا = تسلم لنا يا إبن الرجال الحلاحيل