بهّرت لك حدب المحاني معاميل= وزلّيت لك من نبض الأشواق دلّه
ماغير أنا والليل والثالث سهيل= اقلط ترى مليت غنج وجبلّه ..!
كم لي وانا آخايل طيوفك تخاييل = بصبي عيني صورتك مستقلّه
كم لي وأنا آحايل ظروفي تحاييل = وانته سيوف الهجر دايم تسلّه
يسريبي الهاجوس مع رهبة الليل = اطوي شريطٍ قد مضالي وافلّه
يوم السوالف بيننا والتعاليل = يوم الهوى مابين خلٍ وخلّه
تطري علي لابِهّر الكيف بالهيل = ولاهيجن الجمّال لعيون بِلّه
ولاجاذب المعواد صوت المحاحيل = ولاداعب النبنوب ورده وفلّه
انته غناتي بالسنين المقابيل= وانته صباحات الشروق المطلّه
ياللي هدبك الخرس سودٍ مظاليل= من شاهدك لوهو شجيعٍ تذلّه
لولاي أحبك مازعجت المراسيل= وسامرت نجمات السما المسفهلّه
وحاربت جلسات العرب والتعاليل = وشريت مجلاسك عن الناس كلّه
ذللّت لك جزل التماثيل تذليل = وظللتك بحبٍ تفييت ظلّه
ونحت لك بقصى الضماير تماثيل = وبنيت لك في داخل القلب فلّه
اشكي عليك الحال يانافل الجيل = انته تعرف العلم دِقّه وجِلّه
كلّه على شان الوفاء والمواصيل = بيدك تعقد الحبل وبيدك تحلّه
ماغير أنا والليل والثالث سهيل= اقلط ترى مليت غنج وجبلّه ..!