يا هيه كانك مـا تبا النـاس توذيك = قيس المسافة بين مزحـك وجـدك
بيض السجـايا للمعالـي توديـك = وسـود النـوايا للمـذمة تـردك
لو تجتمع كل البشر لأجـل تغنيك = من دون ربي مـدهم مـا يسـدك
الله هـو اللـي حسـب نيتك يعطيك = ما فيه جود(ن) مثل جـوده يمـدك
اعبر علـى وضح النقا لين ياتـيك = علـم اليقـين وخالـقك يستـردك
لابـد مـن دورات الأيـام تطويك = ويفقـدك من كان أول العمر ندك
لا تقترب من واحـد(ن) ما يدانيك = ولا تلتحف بلحـاف ماهو بقـدك
ساير ظروفك لا تعلـم بطـاريك = كم واحد(ن) يضحك معك ما يودك
وكم واحد(ن) كنه صديق مصافيك = واليا اندرقت أفشى مع الناس سدك
وكم واحد(ن) يشناك لو كان يغليك = وكم واحد(ن) يمدحك لو كان ضدك
احفظ غلا اللي بالمراجل يوصيك = ولا عدت فعـول المطاليق عـدك
وأحذر عـدوك لوعدوك يناديـك = صبر(ن) جميل ولا علوم(ن) تحدك