قصيدة (الشيخه) للشاعر عدوان الهربيد من السويد من شمر
المجلس اللي به اسماعيـل وسعيـد
ينعاف لو قربه على القلـب غالـي
اسماعيل ماسمته سموت الاجاويـد
وسعيـد ماداجـوا عليـه الرجالـي
غيالك الضمران والفـرس ياسعيـد
ياعل مالحميـض الاطعـاس والـي
اخاف من قومـن تجينـا عراجيـد
تبني على روس الندف لـه ظلالـي
مابين شمطـان اللحـي والاواليـد
تضيمنـا ياسعـيـد بالاحتمـالـي
اخاف من اللـي ينقلـون البواريـد
هـل البنـادق ميتميـن العيـالـي
ركضاتهم ياسعيـد مابـه تصاديـد
ذباحـة الطيـب نهـار القتـالـي
اللـي بدكـلات السبايـا سوانـيـد
ياما وقـع بنحورهـم كـل غالـي
ياسعيد لاتضرب علـى دارة الديـد
بزرقاء تسـل الـروح بالاحتمالـي
بديار فطمات البقـر مغتـر الصيـد
ولاعندك اللي عن حوالـك يسالـي
ياسعيد هرجك بـه مغيـر وتراديـد
وتوقر بالهرج الرخيـص الجمالـي
وهرجن على اكناف العذارى مناقيد
مايطيـب الصبيـان كـود الفعالـي
ذرب جوابك يافتى الجـود ياسعيـد
عن قولتن ياحيف سعيـد استزالـي
عميت بالسايـه جميـع القواصيـد
ماقلـت بالشعـار طامـن وعالـي
عميت نمرن والمهادي وابـا زيـد
ريف الضعن حبس الكمين الهلالـي
ومشعان والطيـار وعبيـد ياسعيـد
وعبدالله المسطـور عـز الاهالـي
والعسكري وهديب ومصيخ ورشيـد
وحسين حمـاي الركـاب التوالـي
وجمل وابن حثلين والفغـم وفهيـد
وعنتر ليامن اثقـل الشيـل مالـي
وعرار وعميرن هل الكـود والكيـد
مخليـن سـرج الخيـل ويالدوالـي
ورميزان هو والعرفجي والذي زيـد
وساجر مسـوي للهجيـن النعالـي
وحطاب اللي بالصحن ينثـر الغيـد
وبريك محيـي بالركـاب الهزالـي
وشايـع مجفـل بالفـلاة المفاريـد
وجارد ملفـي بالشخيـل الجلالـي
وجديع خيـال المهـار المصاعيـد
مودع مع الدعكـول مثـل العزالـي
وصعب من الصيداد سقم الاضاديـد
وبرجـس دلال معبسـات الشمالـي
والاشمل اللي مـن منـاه التحاميـد
ومطلـق مطبـق بالغديـر الزلالـي
وجريسن اللي كرمته كنهـا العيـد
ابن سمير اللـي بقـرن الشمالـي
وابن دعيجاء اللي كمابيتـه الحيـد
وسعودن بن سعـود راع العمالـي
ومغير بن غازي ونومـان ياسعيـد
زبن الحشور اليااعتـلاه الجفالـي
وحتى الشريف اللي تقولون ياسعيد
مع حاتمن معطي العطايـا الجزالـي
عشرين مع عشرين لاانقص ولاازيد
وافين من غيـر القصيـد الفعالـي
ياسعيد انـا ثنـواي دون الاجاويـد
هـل المصاحـف متعبيـن الدلالـي
اللي بهم ياسعيد صـدرن وتوريـد
وفهقن وتقليطـن وقـول وفعالـي
والا انت مابك عند ربعـك مناقيـد
وانا بعد مثلـك علـى قـد حالـي
وحنـا عباتـن مابباطـه لواكـيـد
ولا قيـل حنـا بالـدروج العوالـي
وصلاة ربي عد ماهـل مـن عيـد
على النبي وعـداد وبـل الخيالـي
الاربعين الذين اجتمعت بهم الفروسية والشعر وذكرهم عدوان الهربيد هم :
1. نمر بن عدوان من بادية الاردن
2. المهادي من قبيلة قحطان وهو صاحب القصة الشهيرة
3بريك من اهل بقعاء.
4. مشعان ابن هذال من شيوخ قبيلة عنزة
5. جدعان ابن مهيد من شيوخ قبيلة عنزة
6. حسين الذنيب من قبيلة شمر
7. عبيد ابن رشيد
8. عبد الله ابن رشيد مؤسس إمارة آل رشيد
9. العسكري
10. هديب
11. مصيخ
12. رشيد ابن طوعان من قبيلة شمر
13. عقاب بن سعدون العواجي الفارس المشهور من قبيلة ولد سليمان من عنزة
14. جمل ابن لبدة من قبيلة قحطان
15. راكان ابن حثلين شيخ قبيلة العجمان
16. الفغم من قبيلة مطير
17. فهيد بن معبهل الشعلان من الرولة من عنزة
18. عنتر ابن شداد فارس بني عبس
19. رميزان ابن غشام من بني تميم
20. العرفجي من البو عليان من القصيم >>> الظاهر انه حجيلان بن حمد
21. ابن زيد لا اعرفه
22. ساجر الرفدي الفارس المشهور من قيبلة عنزة
23. صعب الصيداد من قبيلة شمر
24. هو سعود بن عبد العزيز ال سعود الاول جد الاسرة الحاكمه
25. بركات الشريف
26. حاتم الطائي
27 . خلف ابن دعيجا من شيوخ الشرارات
28 . محمد ابن سمير الملقب حريب الدول شيخ ولد علي من عنزة
29. حطاب السراح من كبار اهل الجوف
30. ابا زيد الهلالي غني عن التعريف
31. مغير ابن غازي من قبيلة شمر
32. نومان الحسيني من قبيلة الظفير
33 . جديع ابن هذال من قبيلة عنزة
34. عرار من الضياغم من شمر
35. عمير من الضياغم من شمر
36 . كنعان الطيار من قبيلة عنزة
37. برجس ابن مجلاد الملقب : غدير الموت . من قبيلة عنزة
38. جريس التمياط من قبيلة شمر
39. مطلق الجرباء من قبيلة شمر
40. شايع الامسح من قبيلة شم