[ابوطلال1]

السلام عليكم ورحمة الله وبركاته اخواني اود ان اخذ رايكم في قصيدتين اومنهجين ارجو ممن يقرا ان

يعطيني رايه ابتل مع الاسلوب الاول او اتجه للطريق الاخيره

القصيده الاولى قلتها قبل عدت سنوات وهي تقول

ياحمود مالي بكتب المدرسه حاجه=سود الليالي عطني درساً اكفاني
معاد لي رغبتاً بالصف وزعاجه=قلبي عطاله طريق ومنهجاً ثاني
قلبي مع البل وحب البدو منهاجه=حباً ورثته من ابواني وجداني
مشين بها مع فيافي نجد وفجاجه=اخير من منتزه لندن ولبناني
لاجالها مع ترفعت الضحى دلاجه=على فياضن سقتها غر الامزاني
يلقابها من تضايق فلت حجاجه=معها الصدر ينشرح وتغيب الاحزاني
شوف المجاهيم طب القلب وعلاجه=هي رغبتي في حياتي والعمر فاني

القصيدة الثانية

اثر الأماني لاصدمها واقع الحظ العنيد=ينزل طموحك للسهل لو كان من فوق السحاب
اقولها والتجربه منها نفيد ونستفيد=عايشتها قدام لشرع في قرار الانسحاب
عقد وعليه شوي من عمري ونا مالي رصيد=الا بقايا واقع(ن) شيب قبل سن الشباب
احرث صحاري حلمي المزمن وذهني مايحيد=عن صورتن في داخله عيا يغيبها الغياب
الذكريات حراب في صدري لها وقعن شديد=لاوالله اللى اعظم وشد مرار من وقع الحراب
جروحها في داخلي تنزف على اوراقي قصيد=ادله بها فتره وعود احيابها هم وعذاب
كم لي على باب الأمل اطرق بكف(ن) من حديد=والياس عازل صوت بين الباب وصحاب الجواب
طال انتظاري والسنين المجدبه قامت تزيد=مسكين ظميان الهواء معاد يلقاله شراب
والقيض صار اطول من المعتاد ذا شي(ن) اكيد=واكبر دليل ان العيون مهاجراً فيها السراب
إلى هنا يالهفت المشتاق يادم الوريد=حان الوداع اللي قبل ماكنت احسب له حساب
روحي وأملنا نلتقي بكره اليا ذاب الجليد=وان ما حصل ذلك عن الايام مرفوع العتاب

وسلامتكم