البارحه كني من الهم مخنوق=سلط علي الله همومٍ كثيره
هم الغرام اللي كوا كل معلوق= وغيره همومٍ مرمساتٍ خطيره
اثر الهوا شره على كل مخلوق=يوقد بقلب اللي مشابه سعيره
انا غرامي وحدةٍ كلها ذوق= ماهيب لا فاتن ولاهي سميره
اشوفها مثل القمر فالسماء فوق=فيها الجمال وبالوصايف نظيره
ريانةٍ بالعود والعنق منتوق=في خدها للخال حبه صغيره
عنقا شعرها فوق الارداف مفهوق= نوطا تضيع ابها الوصوف الكثيره
عفيفةٍ مادوجت داخل السوق= بنت الاصول اللي تحب الستيره
لقيتها قاهرةٍ الحشو للنوق= في ديرةٍ مامثلها ايات ديره
في خايعٍ نبته خزاما ورقروق=تنقل شحم من حلو عشبه فطيره
ووقفت مثل اللي على الخد مصفوق= مذهول من شوف المها المستذيره
حاولت اكلمها وابي علم موثوق= وسالتها يابنت وين الزبيره
قالت اضنك شخص فاضي ومطفوق=قلت العفو يابنت انا من عشيره
قالت توقع كل مطرود ملحوق=واقلط لبويه فالبيوت الكبيره
ودقيت سلف الجيب وازريت لاسوق= مدري علامي لكن اني بحيره
وعرفت وسم البل وانا اغيب وافوق=وامسيت مثل اللي عظامه كسيره
ماهيب من برقا ولا هيب من روق= من لابةٍ وقت المواجه شريره
واليوم ابنخا طيب الصيت مرزوق= ابيه يسرج كل قبا ظهيره
كوده يوفق بين عاشق ومعشوق= بالجاه والا بالسيوف الشطيره