قصيدة كتبتها في القبيلة العزيزة والعريقه عتيبه والتي تربطني بهم صداقه تتسم
بالطيب والنخوة والوفاء
جزل القصيد من الجزال المهاذيـب =يطرب لها الشاعر على نظم الاشعار
هيضٍ ورى هدف الضلوع المحاديب =من منهـلٍ حلـوٍ مواريـده غـزار
مثايـلٍ تطلـق حجـاج المناديـب =تشرع لها ابواب الرحابه والانظـار
المدح فكرام الّحى مثيب ومصيـب =تردد لها والنعـم ويثنّـون تكـرار
للبرق ماطـر وللطراقـي معازيـب =وللقافيه شاعـر وللخيـل مضمـار
والطيب يحضابه بعيـد المحاضيـب =يسبق على العليا بعيديـن الاذكـار
المدح في عتيبه رحيـبٍ ولا ريـب =ماتقصر الكلمه ولاتشيب الافكـار
اطلق عنان المدح وسنّد على طيـب =ومن الرهاوه اغرف وطب وختـار
الحـق ماغطـه حميـد العواقيـب =ونفسي لها في مدرج الحـق معبـار
شاعر ولي مبدا وعرف ومواجيـب =وهذي لها شيمـه وقيمـه ومقـدار
رفعـة معرفتنـا سنـام المطاليـب = وعتيبه الهيلا لهـا الطيـب ينـدار
تضرب لهـا تحيـة العـز والطيـب =تحيـةٍ تشهربهـا احـرار لـحـرار
عزاز النفوس الوافييـن الاصاحيـب =ربعٍ صداقتهم مثل صبـح الاسفـار
صدق ونقى وعرف ورحابه واساليب =ثلاثين عامٍ مـع صواريـم سنجـار
وياعنك مافيهم مـلام وعذاريـب =يسقي مواطن عرفهم وبل الامطـار
حصون الذرى من حاميات اللواهيب =خويهم مايلحقـه ظيـم واكـدار
يدرون حسـة خاطـره الهباهيـب =يفدى معرفتهم قصيريـن الاشبـار
خوة وفى تغتاض منهـا الاجانيـب =ولها على سلم العرب شيمـة ونـار
من الدواسـر لابتـي والمناسيـب =وكني من عتيبه على طيب ووقـار
اهـم المياميـن الدهـاه اللواليـب =سلة شبى السيف ومداريع الاخطـار
هم مزبن الهارب من الخوف والريب =دخيل الوجيه اللي لها البشت والكار
الراسخيـن الظاهريـن الغواليـب =الغانميـن المستقيمـيـن الاخـيـار
عتيبه الهيـلا الزحـول المعاطيـب =سلاطين وثقـال ورفيعيـن وكبـار
لطامـة العايـل كعـام المغاضيـب =ذباحة الحايل ذرى الضيف والجـار
تاريخهم والمجـد هـول وتعاجيـب =بسيوف هند وشلف وفرسان وامهار
عزمٍ يذلل كل عسـرات وصعيـب =سلايل هوازن منجبة كـل مغـوار
للصيت ذكر الشيخ عطب المضاريب =بن حميد ماحلا سجدتينه بالاسحـار
ومبعد مغازيّه علـى شمّـخ النيـب =ويا مطيب اشعاره على شبـة النـار
قلتـه ونـا والله مالـي مطاليـب =الا انها تبقى وفـى وطيـب تذكـار
قولٍ عليه ابهام عبدالله بـن ذيـب =من دوسري الحـق يجهربـه جهـار
الشاعر : عبدالله بن ذيب الدوسري
آخر تعديل عبدالله بن ذيب الدوسري يوم 16-Jul-2012 في 03:01 AM.
« آخـــر الـــمـــشـــاركــــات »
16-Jul-2012, 02:58 AM
عتيبه الهيلا الزحول المعاطيب
العرض العادي
