مجاراة لقصيدة محمد بن مشيط المري

[امير الصفوى]

(((قصيدة الدعوة )))=
يامن من أجل العز تخسر ملايين= ابـشرك بالعــز و ابـله خســـاره
العــز يا من ترجي الـعـــز بـالـدين=مـا هـوب في الدنيا وحب التجاره
العز في خوة رجــــال(ن) عـزيزين=الـكــل مـنـهـم عــز ربـي و قــاره
يسعون في نشر الرساله من سنين=و فيهم لجهد الدين شوق وحراره
من جهدهم يا ما اهتدو مـن مظلين=ومن يهتدي مـا عــاد غيٍر مساره
يا ما دعو راعي معاصي و تـدخين=يـومـه غــدا ليـلـه و لـيـله نهـاره
و الله هــداه و شكــلــوه الـميامين=و خـرج و طـلق بـالـثلاث الزقاره
وانا من اول كنت غافل و مسكين=واحط نـفسي دايـم(ن) فـالصداره
وسير علي ربع(ن) عزاز(ن) وغالين=و قـالوا عـلى خــوتك نبغي بشاره
قلت ابشرو قالوا متى قلت ذلحين=غصب(ن) على قلبي ما هو بأختياره
بس اصبروا وادعو ان قلبي ايلين=احس انـا قـلبي ســوات الـحجاره
وخرجت معهم وكن فالنحر سكين=اصـارع الهاجوس تـاره و تـاره
نفسي تقول ايسار وانا ابغي يمين=و شنـت علي نفسي ثمانين غاره
وآثر هل الدعوه على الحق ماشين=تعـاونوا لـلـدين لـجـل انتشاره
لقيتهم ناس(ن) صيام(ن) مصلين=يرجون جنات الكريم و جواره
ناس(ن) الى قفى من الليل ثلثين=صلـوا لـوجه الله عـلى طـهاره
في مسجد(ن) ما تقتربه الشياطين=يحرم على الشيطان لمسة جداره
منهم تعلمنا صفات الرظـيـين=و كفــارة المجلس وآداب الزياره
ومنهم عرفت أني اذا أحترت بأمرين=لا بد أصــلي ركعتــين استخاره
تغيرت الاحوال في ضرف يومين=وحقرت عمر(ن) يستحق أحتقاره
عمر(ن) خسرته حول خمسه وثلاثين=ما غير في غفله و لهو وأيثاره
القلب دمه يدفعه بالشرايين=مثــل المدير الي يــدير الاداره
اذا صلح يديرها والله يعين=فازت الاداره بأحترام الوزاره
ولا يطير الطير لولا الجناحين=و اذا انكـسـر ريشه تعثر طياره
وكسر العظم يجبر ولا كان بعدين=لــكن كسر الـدين ماله جباره
يا فاتن الدنيا حياتك الى وين=لا بد من يوم(ن) تزاح الستاره
عليك دين وواصلك راعي الدين=ديـــانك الي مـا يأجــل قــــراره
يضيعون اسمك قرابتك الادنين=وينسون حتى الالقابك المستعاره
وبعده يشيلونك على القبر عجلين=و تحط فـي قبر(ن) يثـور غباره
يذهب معك ثلاثه ويعود اثنين=و الحر يفهم مقصدي بـالاشاره
كان العمل لا جاء سؤال القبر زين=غدا القبر روض(ن) تطارح انهاره
وكان العمل لا جاء سؤال القبر شين= يظــيق بك قبرك وتشويك ناره
اما تفوز بشي ما شافته عين=و لا خساره ما بعــدها خساره
أنشـــالله ان كلــنا مســــتعدين=على العلاج الي بدون استشاره
محمد بن مشيط المري=
::::::::::::=
(((مجاراة)))=
سمعت لي شعراً عميق المضامين = شعراً فريد ويتسم بالغزارة
من شاعر بين لنا العلم تبيين = يملك على بدع الفرايد مهارة
شاعر وله في قلطة الشعر صفين =ويجيد حبك المفردة والعبارة
محمدبن مشيط طلق الحجاجين =شاعر بني مرة شيوخ النعارة
بين لنا احوال الدعاة الميامين =مواعظ المنبر وصوت المنارة
اهل الادلة والحجج والبراهين= أهل الوجيه اللي عليها أستنارة
ناساً تجدهم في جميع الميادين =فيهم على انكار المعاصي جسارة
يستخدمون اللين في موضع اللين =وزجر الذي للدين مبغض وكاره
ذاك الذي زين له ابليس تزيين = حتى عن اهل الخير واصل فراره
يرفض ويبغض صحبة المستقيمين= وموجهاً للغي موجة رداره
والسير في ركب التقاة المنيبين = يوصل الساير محل الصدارة
الوارثين العلم بعد النبيين = مشاعل الدين الحنيف وشعاره
اللي عن الدين المطهر محامين= هم عزته هم قوته وانتصاره
قارين لايات المهيمن وتالين =وكلاً على المصحف تناثر عباره
لا حاورو عدو نصوص الصحيحين = الخاليات امن الخلل والنكارة
أمار بالعروف كل الاحايين =في كل قطر وكل وقرية وحارة
ولكل منكر منكريناً وناهين = لو يغضب الغاوي ويقدح شراره
وبقوى الادلة دايماً مستدلين= لبدا المخالف كل فتنة واثارة
بالله جلت قدرته مستعينين= والزهد فيهم له علامة وامارة
ما همهم من حارب الشرع والدين= لوهو على الدعوة يضيّق حصاره
على منابرهم سواة السلاطين = واعطاهم الله الدهاء والشطارة
والعلم لو هو من ورى الهند والصين = كلاً حجز له تذكرة من مطاره
ثم شدو الترحال صوب العناوين =والكل ما وده يغادر دياره
لكن من أجل العلم صاروا مضحين = رغم المتاعب والكبد والمكاره
دايم مواعضهم لها الناس مصغين =والمستمع منها يزيد انبهاره
في كل علماً يخدم الدين ماضين = وبكل مظماراً سوات النمارة
لا حدثوا عن بدر والفتح وحنين = واخبار سيدنا محمد واثاره
واللي جرى في القادسية وصفين = يوم الوغاء كلاً تعلى مهاره
شعرت بالعزة لمن طبق الدين =اللي لهم في كل منحى جدارة
كانت لهم نجدة وعزة وتمكين = واهل جهاداً وهل نصرة واجارة
ون حاربوا في حربهم مستميتين =والباس في الميدان خاضوا غماره
ون شكلوا في مسرح الحرب صفين = كلاً يبان اتحمله واصطباراه
هم الكرام الخيرين المسمين =سادتنا اللي بشّروا بالبشارة
اللي يحثونا لنصرة فلسطين =على اليهود أهل الخنا والحقارة
بثنين والعشرين من بعد الالفين = يمكن يجي نصراً كبيراً نهاره
وختامها عنبر ومسك ورياحين = والعود الازرق في محل العطارة
جندب المالكي=