وضع اخي ابو ضيف الله رابط لاحد المواقع ... ولما تصفحته وقع تحت
نظري صورة معبرة وحزينة كنت قد وجدتها قبل تقريبا اربع سنوات
منشورة في احد الصحف ومعها قصيدة للشاعرمحمد العطوي ...
فذهبت اقلب اوراقي القديمة حتى وجدتها وهاهي بين ايديكم
باقي ذبالة نسم في جسمي العاري=والليل داني وعين النسر ما اقواها
ما لي رجا الا بفزعات الله الباري=يرأف بحالي وياخذ روحٍ اعطاها
يارب ما اقوى على ذا الاقرع الضاري=اللي يبا يخطف الجثه ويفناها
انا ضعيف العزايم وانت بي داري=يكفي لروحي من الاهوال ما جاها
ياسيد الطير ياسلطان الاوكاري=احسبك ماتقبل الجيفة وترضاها
وش بك تحفز كما اللي يطلب الثاري=ماشفت غيري من اقصاها الى ادناها
اصبر عسى ما طواك الجوع ياجاري=والا لك صغارٍ تطعمها وترعاها؟
معذور،كلٍ على منفوعه يداري=في عالمٍ يرسم الصورة ويمحاها
انا صريع المرض والجوع في داري=والخير فيها يميزها ويملاها
والله ما مارست يمناي ويساري=ذنبٍ سوى اني من آدمها وحواها
ابودع الارض همي واخر اسراري=ماودي النسر جوى الصدر يلقاها
خايف عليه يتغنى بين الاشجاري=ويصيغ للطير مأساتي وفحواها