يارفـيـع المـنزل أنا أجيتك بقـاف عصامـي!!

[احمد الزايدي]

ياسلام الله عليكم عد مـن صلـى وصامـي=من هجوس الشاعر اللي كل طاروق يجيبـه
يارفـيـع المـنزل أنا جيتك بقـاف عصامـي=والـهـــدف تـــراه يـعــجــز كـل هـــداف يصيبه

[رفيع المنزل]

مرحبا بك عند ربعك يوم بديت السلامي = وانت شاعر كل حاجه منك ماتحسب غريبه
مار وش عندك خبر يانور جلاي الظلامي = عادتك تسرح بخير وثم تضوي في مصيبه

[احمد الزايدي]

البقا وأنا السلام أولمه قبل الكلامي=سنة واجب على المسلم دواما يبتدي به
عادتي علم الوفاء وأنا سلاحي في حزامي=وأبا أشب النار مار أحذر تحول فالهيبه

[رفيع المنزل]

يوم يااحمد ماانت جاهل بالحلال وبالحرامي = افتني عن حال داور ٍ مضيع له ذهيبه
كل ماشاف الطراقي قام بيدينه يوامي = وان نصوه اثري علومه بين شك وبين ريبه

[احمد الزايدي]

الذهيب أيضيع دايم مر شرق ومر شامي=مارحق الله أنا ما ارضى على مثلك غليبه
وأنتبه ليمينه اللي شايل فيها الحسامي=كم شجيع مات من سيفه ورمحه يعتزي به

[رفيع المنزل]

مانلوم الا زمنا وانت يااحمد ماتلامي = مار من طشك على الجمره عسى ربي حسيبه
داخل اسواق الغلا تجار يلقون اهتمامي = ويش يبغى الزاير اللي مامعه مايشتري به

[احمد الزايدي]

يارفيع المنزل أنت من اليمن والا تهامي=ماانت لافارس والاتصلح مدرب للكتيبه
وأنا تاجر داخل أسوق الغلا واعرف نظامي =يافقير الحال ساء حالك ولاحد قد دريبه

[رفيع المنزل]

انت تنشدني وانا اسمي مع كبيرين الاسامي = وقفتي وياك كله خوف من شرهة عتيبه
الفقير اللي يجي بين العرب جايع وظامي = مالقا من يطلع ريالين يولجها بجيبه

[احمد الزايدي]

مدحك النفسك مصيبه كل يوم وكل عامي=والصعـيبه ماانت راعيها على مثلك صعـيبه
والفقر يشمل معاني كثر وش فيك (ا)متعامي=ودي أنك قــدوه الغـيرك ورجل نقتدي به

[رفيع المنزل]

الوكاد اني مااحطك خصم في يوم الزحامي=ياعميل ٍ لنت له واقبل علي خبثه وطيبه
الرعاية ماتقصر فالشراب وفالطعامي = لانزل فيها يتيم من اليتامى تعتني به