أنا وظــــلي!

[د . حمد العصيمي]

ظلي اللي خذا مني قليل الكثير= كنت اراعيه يوم امشي سواة ولدي
التفت له وهو يمشي وراي ويسير= مثل طفل بخطوة والده يقتدي!
كنت امامه بصير وكان خلفي ضرير=يلتمس خطوتي وبصوتها يهتدي!
واتخير له الدرب الهوين اليسير=واتجنب عن الدرب الصعب واحتدي
كنت امهد له الديباج تحت الحرير=لو تكلفت في راحته فوق جهدي!
كل ما اكبر تمنيت ان ظلي كبير=وان ترديت ما ودي يسمى ردي!
ما ربطنا سوى الغاية ونفس المصير=هكذا كنت انا وياه من مولدي!
لين شمس النهار وقرصها المستدير=مالت وجابته قبلي وكان بعدي!
قصرتني وانا والله ماني قصير= طولتني مع الاصحاب مدة يدي !
هكذا صحبة اصحاب الرخا يا سمير=تنتهي فا الظلام وفا الضيا تبتدي!
بس قل للظلال اللي تمايل عصير=ان وجه الزمان اغبر وكفي ندي!
واني بخير والدنيا تراها بخير=وان ليل الشدايد ماهو بسرمدي
وانت يا ظلي اللي تحسب اني صغير=كم سبقتك وانا جالس لو انت تعدي!