قصيده ومعارضه ومردود

[سلطان ابن حامد]

السلام عليكم

إليكم هذه الإخوانيّات









شرهة عقل
شعر/ سلطان ابن حامد

ياللّي تجي فيصل وتدرك وصاله=عطه الكتاب وحامض العلم عطنيه
قلّه تراني ما أطلبه من حلاله=وعهدٍ عطانيّاه مانيب ناسيه
شهرين والثالث على أوّل هلاله=أنادي الروقي وكني ما أناديه
وأنا بفضل اللّي عزيزٍ جلاله=لا راجيٍ غيره ولانيب راجيه
لكنّ لا جيته عسى الخير فاله=قلّه ترى الموضوع كلّه وما فيه
شرهة عقل ماهيب شرهة جهاله=لأنّه على الطيّب تجوز المشاريه
ماجوبها الجيره وحق الزماله=وكلمة عتيبيٍ تميته وتحييه
فإمّا يقوم إبها ويكسب جماله=وألاّ يقدّم عذر والله يحييه
حنّا مع الطيّب على كل قاله=وخويّنا بالمخطيه ما نجازيه

______________

بيت الجزاله
مردود الشاعر الكبير مرزوق المقاطي

ياللي تجي سلطان قله لحاله=إنّي معه في كل طرقه مخاويه
كريم يابرق" سرى في خياله=إنقضّ سيله وإنحدر من علاويه
عز الله إنّي كنت سالي وداله=وهجوس شعري راتعه في محانيه
وجتني رساله مابعدها رساله=من واحدٍ قلبي يعزّه ويغليه
أشفق لشوفه كل ماجاء مجاله=وأطرب لشعره كل ما حلّ طاريه
شاقتني الحكمه وبيت الجزاله=وغنّيت طاروقه وحبيت أجاريه
كان العصيمي راهياتٍ حباله=يآرد على هدّاج تيما ويرويه
يترك هماج الماء ويشرب زلاله=وأنا عليّه بالملازيم لأرضيه
يالربع إبن حامد وش اللي طراله=يعاتب الروقي ويزعل بناخيه
يسأل وأنا بأجاوبه في سؤاله=وأبا أعتذر كان المعاذير تكفيه
من لا حمى من دون عمه وخاله=جعل الحليله يا أبيض الوجه تبكيه

______________

شطّ الفرات
ومردود الشاعر الكبير نيّاف ابن نمّاس السميري

يامرحبا باللّي يشّرف مقاله=ترحيبة اللي منتحيٍ عنه غاليه
عقب البطاء شافت عيونه خياله=لو تنهمه بالصوت ما عاد يوحيه
من روس ربع ومن علاوي سلاله=عوق الخصيم وطالب الحق تعطيه
والطيب مع جرد الفجوج تعناله=بالأحمرين وغالي الروح تشريه
والحق يا سلطان حكمه عداله=والكيل والمكيال من حظ موفيه
وطلبك من قال إلك صعبٍ مناله=ولا فيه شيٍ يا أبيض الوجه نخفيه
مالٍ يزول ومال عسرٍ زواله=وما دوّنت صفحات الأمجاد تبديه
والرجل لوّ يحسّب اللي غداله=حارب بني عمّه وحارب عوانيه
وقلّ للمقاطي ما وردنا ثماله=شطّ الفرات يسوق يمّه ضواميه
والحرّ ما تجرح يمينه شماله=وسود الليالي نازح الدار تدنيه
الله يطوّل ما بقى من لياله=الشاعر اللّي هيّضتني معانيه
وإقبل تحيّاتي نيابه وأصاله=مالاح برّاقٍ سرى في مناشيه

وسلامة الجميع ،،

التوقيع

توترتي هنيـّا : )