يــاهــاجسي البدع والرد

[هلال العتيبي]

البدع لاخوكم هلال العتيبي

ياهاجسي ماغير انا وانـت والجيـب=سيّـر بنـا يـم الـديـار العـذيّـة
دار المكارم والشـرف والمواجيـب=منشـى عتيبـة صفـوة الشاذلـيـة
ياهاجسي فزعتك انا ب امدح شهيـب=مـن الحصـون النايفـات العلـيّـة
تستاهلـون المـدح يامنبـع الطيـب=يااهل الكرم واهل الوفـاء والحميـة
قبيلـةٍ ماحافهـا النقـص والعـيـب=فخـر ثبيـت اهـل الحـلال النديّـة
مخصبين العـز والمجـد تخصيـب=كانـوا ولا زالـو قبيـلـة قـويّـة
واخص ابو فايزعطيب المضاريـب=الفـارس اللـي مايضيّـع خـويّـه
اليـا لفيتـه حـي هـاك التراحيـب=دار ووقـار وهيـبـة ومعنـويّـة
والله مايلحقـك لـومـن وتثـريـب=وانت السحاب اللي صدوقـن نويّـه
إن قلت راي تصيب وتصيب وتصيب=كثـر الهجـاء وحروفـه الابجديـة
وان قلت شعر تهذّب الشعـر تهذيـب=جـدّك رحيّـم منهـل الشاعـريّـة
لبّي شجاعـة سالـم الزيـر وكليـب=ولبـيـه ياوقفـاتـك الحاتـمـيـة

المجاراة للأستاذ الشاعر ابو فايز فارس الشهيب

حي الجواب اللي لفى ذيب من ذيب=يجاوبـه فالحـال والنـار حيّـه
من لابةٍ توفي نهـار المطاليـب=الاد ناجـم تاخـذ العشـر ميّـه
ألاد ناجم كـان فيهـم عذاريـب=عذروبهم يوفون الاخصـام كيـه
وقفاتهم تبري جـروحٍ معاطيـب=يـوم الخيـول وسلـة النافعيـه
وفزعاتهم ستر البنـي الرعابيـب=يحكمـون السـيـف والبندقـيـه
ينومسون ضيوف ولا معازيـب=ما يدعون الطيـب فيهـم سجيـه
ذكرتني بايام ما نعـرف الشيـب=بين العيينـه والقصـر والثنيـه
يا ما رقينـا عاليـات المراقيـب=ونردد الانشـاد صبـح وعشيـه
وياما سرينا دون شكٍ ولا ريـب=علـى النقـا ونغنـي السامريـه
واليوم نرسل فالمواقـع مكاتيـب=ماعاد فينا حيـل روحـه وجيـه
والله مالي عن هل الطيب تجنيـب=ومهما نقدم فـي قدركـم شويـه
جاني جواب مرتب الحرف ترتيب=هـلال يفـداه الـردي والهفيـه
لبّى حروف النور عكف المخاليب=ولبيه لحـروف الوفـا اليحيويـه

.