سمان الهرج

[جمال الربيعي]

بسم الله الرحمن الرحيم


أهديها لكل الأحبة مع ودي ووردي



( سمان الهرج )

قتلت يا قلبـي مشاعـرك بيـدي = بالله علمني وش احيا مشاعـرك
الذكريات اللي رُبت فـي وريـدي = والا القلم والبوح و أوراق شاعرك

.
.

يا قلب علمني وش أخبار سيـدي = اللي على المسحوب نوّخ اباعرك
اللي رحل واختار سكـة حديـدي =واللي على الآهات باقي يسّهـرك
اكتب من الآشواق هـذا جديـدي = لا زالت الأطلال تبكـي منابـرك
وإن كان يقراني ويبغى قصيـدي = بالله ياقلبـي علـى كفـتـه إرك
إرك الحمول اللي بكاهل بريـدي = واللي على شانه معّبـي دفاتـرك
اللي فديته من عيونـي وجيـدي = يستاهل الجزله على شان خاطرك
صوب اليمن والهند والسند زيدي = يا لحظة التّنفيس فاتح مقابرك
على سمان الهرج مطلق عبيـدي = عليهم التنفيذ لا جـات اوامـرك
هذي الرسـالة ودّهـا ياعضيدي = عبر الأثير لدار الإسـلام والشرك
خله يزيد الأسـئلة في رصيـدي = وأنا بزيد العاطفه في مؤشـرك
وّزع من التحنان مليون سي دي = وأنا على الأطلال برفع من آخرك
بضّغـط الآزرار وآقـول عيـدي = لعل ترسـي فالموانـي بواخـرك
وإن كان هذا العيد ماهو بعيـدي = بذكّرك ياقلـب وارجـع واذّكـرك

.
.

قتلت ياقلبـي مشاعـرك بيـدي = بالله علمني وش احيا مشاعـرك
الذكريات اللي رُبت فـي وريـدي = والا القلم والبوح و اوراق شاعرك

وسلامتكم

الشاعر : جمال الربيعي
( داعي الذكرى )

.