طيري

[سند العتيبي]

من الجديد

ياليت قلبي على اللي صار يبقى جسور=ويا ليتها مـا تصيـر لواحـدٍ غـاري
ياليت طيري معي مازاد في الحـرور=وياليتها جاتني مـن واحـد امطـاري
ياشين طعم المراره فالنحر في حـدور=وياشينها كسرة الدفـه مـع الصـاري
ياشينها اللقمه اللي ترتكي فالنحور=خصٍ ليا صرت منته للغصص ضاري
ياطيري اللي غدا واثر السبب فالغرور=ياطير مانته بناسي حبي وخاري
الله يعطي وانا اعطيتك وكلي سرور=يازينها سمحة البايع مع الشاري
ياكثر ما تارد وياقل ما هي صدور=ماهمها الوقت لو ما يامن الساري
اشوف في تالي الأيام فيها نفور=محدٍ لسبّة نفور اطوارنا داري
اما تعوّد ومن عوّد تراه امعذور=والا تروح وعسى ماعاد لك طاري
وليا حداك الزمن والجوع فأم الشرور=عوّد وابا اقول..يامرْحبْ..هلا طاري
تكفيني ابشوفتك نسيان كل الامور=ولاهمني هرجة الحاقد ولا الزاري
صقارك اللي يعزك ما تعوضه صقور=ياصقري اللي بطيبه دايم اماري
لكل صقار..واحد...من جميع الطيور=له في ضميره محبه حطها الباري
والله يعلم خواف الحب جوف الصدور=ويسيّر الامر بامره أمرنا جاري
ياليت قلبي من اللي صار يرجع طهور=وياليتها تسلم السافي...من الذاري