((مطير وعتيبه )) .. بين العتيبي والمطيري صداقه .. من عصرنا الاول الى وقتنا الحين

[سعود بن عيد العضيله]

السلام عليكم ورحمة الله
عندما رايت ان هناك من لاتعجبه العلاقه الطيبه والمتميزه بين قبيلتين عزيزتين متجاورتين قبيلتي مطير وقبيلة عتيبه ويثير النعرات والعصبيات الجاهليه واشعال الفتنه خاصة في بعض المسابقات الشعريه وغيرها ، جادت قريحتي بهذه الابيات :

بين العتيبي والمطيري صداقه ... من عصرنا الاول الى وقتنا الحين
اخوان فالاسلام ربع ورفاقه ... وهذا طبيعي فالعرب والمسلمين
واللي مشكك في وثوق العلاقه .. يروح للدوشان والا الرباعين
ينشد شيوخ المعرفه والعراقه .. ويلقى الجواب اعلوم زينن على زين
واللي مضى من جهل والا حماقه .. كانت قبل مايدخل الناس فالدين
كانت تقوم المعركه لاجل ناقه ... كان السبب فيها اضعوف ومجانين
اكبر فخرنا ديننا واعتناقه ... شريعة محمد بها العدل واللين
جيران مااحد خان جاره وباقه .. غير النسب معروف بين الاصيلين
عدونا ماهو على اسم البطاقه ... عدواننا هم اليهود الملاعين
ولو كان فيه اشخاص فيهم صفاقه .. يبقون دوم ايسار والعالم ايمين
لمطير وعتيبه ثمانين باقه ... من الزهور اليانعه والرياحين
هدية ن لاهل القلوب الرقاقه ... يستاهلون الطيب قومن كريمين
الطيب فيهم يعشقونه اعشاقه ... ولاهي غريبه فالرجال الشجيعين
اعلومهم جزلات ماهي ادقاقه ... الله خلقهم روس ماهم كراعين
حذرا منافق ما تبين نفاقه ... يبي يخرب بينكم يالنظيفين
يجيه على ضر الاجواد فاقه ... خبيث طبع ورفقته للشياطين
العز والنوماس قايم اسباقه ... وكل القبايل والنعم بالملايين
الخير نفتح له ثلاثين طاقه ... والشر نغلق بابه ويبطي اسنين

سعود بن عيد العضيله المطيري