أوراق شــاعــــر

[هلال العتيبي]

يادانة الساحـــــل الشرقي متى الله يريـــد
يجيك غواصك المغــــروم والاتجيــــــن

بحّار ومغامـــر وشاعر وعشّــاق صيـد
يشقى ورا الصعب والدر النفيس الثمين

يلاحق المستحيـــــل بكل فـــــجٍ بعيـــد
ويضمّنه ذكريات مع حصـــــاد السنين

ياخذ قراره بلا رجعــــة وراسه عنيـــد
يمكن بلين الصخـــر لكن هو مايليــــن

واليا نشدته وش انت من التعب مستفيد؟
قال الشقا لو سدى في حشمة الزين زين

ويقول انا مابذرت الود لجل الحصيد
لا على شان تكبـــر شجرته فالوتين

ويقول بعض البشر للروح جنّة وعيد
طاريه عودة وفل ونرجس وياسمين

هذا الغلا العف يبقى فالضمايررصيد
ماعكرته الظنون وسطوة الحاسديـن

مجرّد احساس طاغي يدّرج فالوريد
يسير سير الدما ويشق صدر الحنين

ان زار طيفك عيوني نبض قلبي يزيد
تكرم عيونك وتكرم لجلهـــا كل عين

غلاك بين الحنايــــا سرمدي مايبيــــد
تذبل نجوم الليــــال ونور نجمك يـبين

فيك اختصرت الفرح والحب يااعزّ سيد
وعن غير حبك ف انا من جملة التايبين

انت اجمل اوراق عمري وانت بيت القصيد
وانت الضنين الذي م ارضى بدالـــه ضنين

اليـــا تخيلـــت وجهـــك طــــل فجــر جديـــد
لو ترحل الشمس م اسأل راحت الشمس وين