يازمان العجايب

[عبدالله الفهد الاسعدي]

يازمان العجايب يازمان العجب = وش بقى ماتغير وش بقى مايصير
وش حصل بالليالي وش حصل للعرب = كل شي تغير كل شي خطير
الرماد يتحول من رماد لذهب = والذهب عند بعض الخلق شي حقير
والزلال المصفى يحسبونه غرب = والهماج المكدر يشربونه عصير
والنصيحة ليا جت صنفوها عتب = والنميمة تجي من باب نصح ومشير
الصديق المصدق بان وقت الكرب = ماتخلى عن الصاحب عنه ماينير
يوم باعي طويل الكل مني قرب = كيف تنسى زمان فيه باعك قصير
يوم راع المصالح شرب مما شرب = صدر الرجل راوي بعد لفح الهجير
الله ألي كشفهم بان منهو لعب = بان صنف الزوالي وانكشف ذالحصير
فيه جمر الغضى وفيه طفو الكرب = والرجل يفرق الاصناف دامه بصير
الله الي فرقهم فرق راس وذنب = خلق ربي وهو بالخلق رب خبير
مير حسب حساب حاسبه من حسب = قد سبح بالبحر كانك تخاف الغدير
ماحدٍ يزرع الحنظل ويجني عنب = ولاحدٍ قال ريح الثوم فيه العبير