ياحظ من عزوته روقي وبرقاوي.. ( بمناسبة الفوز الكاسح في مزاين أم رقيبه )

[عيضه الثبيتي]

وصلتني رسالة من أخوي /وافي ضاوي العتيبي(عضو منتديات الهيلا)

يطلب مني كتابة قصيدة بمناسبة اكتساح قبيلة عتيبه للمراكز الاولى في جايزة المؤسس للمزاين الابل في ام رقيبه...ويتمنى انّه شاعر ليقول قصيده في هذه المناسبه....

وعتيبه تستاهل ووافي يستاهل..

ومنتديات الهيلا تستاهل


وأسمعوا يالنشاما//

ياهاجس الشعر وصّل لي تحياتي=و وصّل تحايا عتيبه وأبلغ الراوي
يأخذ بيوت الفخر والمجد من رأسي=ومن هاجسٍ في طواريق الفخر غاوي
بالخص لا جيت أقول الشعر فالهيلا=ما ودّي ألاّ أنّي أطرب كل هيلاوي
ديمومة ً سبّلت من صدر شاعرها=وسيولها جات لا ترحم ولا تاوي
منقيّة ً من بيوت الشعر ناقيها=الندّر اللّي بصدري ذيبها عاوي
أسوقها سوق من حشمة بني عمّي=اليا أستوت لي وصار الدرب متساوي
معطره والحميّا عطرها الفاخر=قدام لا أنثر عليها المسك والجاوي
طلبتني ياولد عمّي وقلت أبشر=وأنا قبل تتصل بي خاطري ناوي
وهذي قصيده من لساني عن السانك=والله ما أردّك ..وتبشربي يابن ضاوي
بأسم عتيبه من العارض ليا الحرّه=وجميع من فالوطى روقي وبرقاوي
اهنّي اللّي تشرفنا مواقفها=يوم المزاين كما المطرود والحاوي
من كل صنف املكوا مايبهر الناظر=ولاهي غريبه عليهم مالهم قاوي
والنوق ماهي رخيصه عند راعيها=يتعب لها لو طواه من الزمن طاوي
فيما مضى الدّم الأحمر لجلها ينثر=لا صيّحت وأنتخت فالعطفه مضاوي
واليوم في جايزة عبدالعزيز اللّي=حرر بلادي ومدّن كل بدّاوي
وفأم الرقيبه حضر ربعً تشرّفنا=وحضورهم يجرح الأكباد ويداوي
أذوادهم تسحر الجمهور من داني=يحكي بها السارح ويحكي بها الضاوي
وأهل الملايين ساقوها لهم طمعه=واللّي ما منهم شرى وا نجمه الهاوي
وفي ساعة الجايزة ما اكثر من أسماهم=ولا فالقبايل قصور وبلّغ الرواي
أنّا عتيبه هل الطالات من مبطي=نهوى المراجل وهي لعتيبه تهاوي
وللعز والمجد يابرقا ويالرّوقه=وياحظ من عزوته روقي وبرقاوي

:

:
:
أخوكم/عيضه الثبيتي

24/1/1432

خاص بمنتديات الهيلا فقط

التوقيع

البارحه كان اللقاء مابينا كله حلو=احلا من السكر وكلّك يابعد عمري حلا!! من يوم ماقلتي ياروحي يابعد عمري:(الو)=وأنا بخير وعافيه قدام لا اقلّك :(هلا) للتواصـــ عيضه الثبيتي ــــل ezah_6@hotmail.com (ديواني) http://www.otaibah.net/m/showthread....131#post925131