عااااجل : من الديوان الشعري إلى الديوان الملكي

[عبدالله بن نور الأسعدي]

،

،

السلام عليكم ورحمة الله وبركاته

هذه القصيده أعتبرها واجب أدبي ... وهي

حديثة الصياغه ... وأقول بعد عسى اعماركم تطول :

تهيضت وبديت ابمن بذكره تطمئن اقلوب=هو الله وحده وخير البدايه لابدينابه
ومن ديوانه الشعري يدز الاسعدي مكتوب=إلى ديوان عمدان الوطن ونا من اطنابه
مفاده عد خلق الله وعنده عدهم محسوب=له الحمد وله المنه على الخير اللذي جابه
شفا اللي رافع الرايه نشوفه خيرنا المرقوب=ولو حنا غياب اعْنَ الوعي في فترة اغيابه
يبو متعب تعبت وكل شعبك من تعبك اتعوب=يبو متعب تشافيت وشفاك الشعب يشفابه
سلامات وطهور وذا دليل انك رجل محبوب=لدى رب العباد وحظك انك ضمن أحبابه
يقدر لك سبب واحد عشان انه يزيل اذنوب=ولو في حجمها تازن جبال الكون وهضابه
دليل انه يحبك عان من فعلك دول وشعوب=جميع اقلوبها وعقولها بالحب منصابه
عسى من لامنا في حبنا لك ينطري منكوب=عشان انك تغيثه ويْعَرِف واحد من اسبابه
إلى حكامنا اللي حبهم فقلوبنا مشبوب=خذوا منا عهَد بالفعل ماهو نطق وكتابه
ولاني نايب آل اقراض أو نايب ذوي شنخوب=ولا نايب ذوي عبيان والا شامل عتابه
عن الشعب الوفي كله أنوب اوجيتكم مندوب=أجدد بيعة الحكم الأبونا ونتباهابه
لكم منا ولا والكم نقدم روسنا ماجوب=فدا الدين وفدا موطن عزيز وعزنا اترابه
ترانا كلنا عسكر لو اكثرنا لباسه ثوب=ليا من ثارت الهيجا نضد اجيوش حرّابه
ليا جانا عدو يزحف مثل زحف امهات اجنوب=على نيراننا والله ليشكي من تقلابه
ندوس اللي نفث سمه يبى الإفساد بالعرقوب=بعدما نكوي اخناعه بنيرانه ومنسابه
ترى الشعب السعودي عاقل ولايجهل الملعوب=ولامنهم حدن رايح مع الكذاب واحزابه
لأن الحاكم الحالي هو المصلح هو المرغوب=هو اللي للعرب محزم ودرع وسيف وعصابه
لأنه هو واخوانه ورى امعزي بخير ادروب=هي القرآن والسنه ومنها الخير عشنابه
قبل حكم السعود اوبعده انشوف الوضع مقلوب=إلى الأحسن وشاعركم دليله قول شيّابه
قبل كان العسر بالحج والعمره غصب مصحوب=بعد عان اليسر شقيقها والها هو ايشابه
قبل كان الامن معدوم ذا ناهب وذا منهوب=بعد عان الرجل يرقد وبيته فاتح ابوابه
قبل كان الرجل يجلس شهور اوهو خلي اجيوب=بعد عان الرجل في كل بنك امعبي احسابه
قبل كان الفقر ذيب الرجال اولاهو ابمغلوب=بعد عان الفقر فاقد مخاليبه وأنيابه
قبل كان الفلاني والفلاني دايما فحروب=بعد عان المقيم ايعد كل الشعب أقرابه
قبل كان الغني من ماله البيت الشعر منصوب=بعد عان الفقير ابلاش مسكانه ومزهابه
نِعم لو تنتعدد عدها في عدها مضروب=وناتجها يضاعف لين تخرب كل حسّابه
عساها دايمه والشكر للواهب من الموهوب=عساها ماتجيها عين من هي نالت اعجابه
تطمن كل شعبك ياملكنا لبوا المطلوب=قلوب الشعب تدعي لك بسر افوقت الاجابه
ختام القول صلو عد ماينطف لذيذ الذوب=على نبينا المرسل وكل آله وأصحابه

شــع ــر / عبدالله بن نور الأسعدي العتيبي

آخر تعديل عبدالله بن نور الأسعدي يوم 20-Mar-2011 في 03:05 AM.