" مسوّده .. مسودّه "

[حسن إبراهيم الدجيماء]

.
السلام عليكم
.

لا يامشاري علا ضغطي على حدّه = من زود في زود مار الصبر له حدّي
من ليلة البارح الأعصاب مشتدّه = أشدّ وتشدّ وأضعف شدّها شدّي
أنا وسمر الليال العوج والشدّه = والغيب خيره وسوّه ندٍّ لـ ندِّي
تصويب ومداحم وهجمات مرتدّه = وأهداف متتالية بالرجل واليدّي
والحظ جاير وجور الحكم لابدّه = لا ( بان ضعف الضعيف وقوّة المدّي )
اشوت يمّ الهدف وتناحر القدّه = ولاحصل لي خلف فالجهد والكدّي
من عقب ماكنت شاعر ماحدٍ قدّه = اليوم منهو على قدّه على قدّي
مابين شحّ الزمان الباير ومدّه = وظروفه الصعبة اللي بيّحت سدّي
للواقع ألدّ شوف العين وأصدّه = وأخاف من مقبل الأيام وأعدّي
لو إني أدري صدوف الدهر ممتدّه = وسلاسل مسلسلاته من عصر جدّي
لكن زمنّا تساوى مزحه وجدّه = وأخلف مساره مسار الصارم الجدّي
والله له الحكم والأقدار في يدّه = والغيب مكتوب وسط اللوح ومعدّي
النفس ماتحتمل والقلب ماودّه = والدمع مجرا مسيله بيّن فـ خدّي
من هول ماشفت زود الذل من مدّه = من عقب عزٍّ عزيز وساده تسدّي
الغرب يبسط نفوذه جور ويمدّه = على ضفاف الديار المسلمه مدّي
مسوّدات الأمن والعدل مسودّه = سوّد سواد الوجيه الوجه وأسودّي
مجهّز لْنا الجيوش وممّن العدّه = اللي سلم ليلته لايامن الغدّي
يزل ويذل دوم ونفتح السدّه = اليا اعتذر عقب جزّ الروس والجدّي
يالله بسيلٍ مثل سيلٍ جرف جدّه = وألا بطوفان ماياقف له السدّي
يمسح معالم ديار الشرك والردّه = ولابه شبر ماخذا حقه من الهدّي
هذي هواجيس من وضع العرب حدّه = يبيح ماكنّه من سنين ويعدّي

.

إحترآمي
.