نهــــــاية طـــــريق!!

[عيضه الثبيتي]

مساءكم شعر..

وقفت بنهاية طريق..أدوّر بداية طريق=وأقول لدروبٍ خذتك: هنيّها وهنيّها!!
تقطّع أنفاس الأمل مابه زفير ولا شهيق=والدار مايعجب هواها عُقبك ولا ميّها!!
لو السحاب يهل وبله فوقها مابل ريق=اللّي عطاء وجهه لدنياه وعطته اقفيّها!!
ولا أقول ماباقي على الدنيا صديق ولا رفيق=ألاّ..أصدقائيه بالعدد كثر النجوم وضيّها!!
وإعدائي تسع أعشار صدقاني ..ويانعم الصديق=اللّي يقول أصبر على جور السنين وغيّها!!
وألا ّ أنت ياللّي لو يجرّبك النحل عاف الرحيق=والشجره اللّي من هماليل السحابه ريّها!!
يمكن يضيق الكون أبك لكن صدري مايضيق=وعن لاهب الكنّه تناديك الضلوع وفيّها!!
أحلّفك باللّي جعل في مكه البيت العتيق=أنّك لتطوي صفحة الماضي وتنسى طيّها!!
تراي ماطيق الهجر والقلب برضه مايطيق=ومياسم الفرقا على قلبي توالى كيّها!!
وأنا الذي سيّست بنياني على الساس الوثيق=وعن كثرة علومي يكفّي ملحها وشويّها!!
محبتك لن جيت أدوّر زيّها شيًا يليق=مازيّها/مازيّها/مازيّها/مازيّها!!
والساعه اللّي ودّتك عنّي ..عساها في حريق=والساعه اللي ردّتك ترحب ويالله حيّها!!

وحياكم الله أنتم بعد



محبكم



عيضه الثبيتي

27/3/1433هـــ

التوقيع

البارحه كان اللقاء مابينا كله حلو=احلا من السكر وكلّك يابعد عمري حلا!! من يوم ماقلتي ياروحي يابعد عمري:(الو)=وأنا بخير وعافيه قدام لا اقلّك :(هلا) للتواصـــ عيضه الثبيتي ــــل ezah_6@hotmail.com (ديواني) http://www.otaibah.net/m/showthread....131#post925131

آخر تعديل عيضه الثبيتي يوم 19-Feb-2012 في 09:11 PM.